У Крычаве Магілёўскай вобласці старшыня райвыканкама Аляксей Шарай праз TikTok заклікаў мясцовых жыхароў і арганізацыі сабраць грошы, каб паставіць новыя аўтобусныя прыпынкі. Шмат хто абурыўся просьбе — а дзе бюджэтныя сродкі?
Заклік скінуцца на прыпынкі прагучаў у відэа, апублікаваным у сацсетках выдання «Кричевская жизнь». У ім старшыня Крычаўскага райвыканкама Аляксей Шарай паведаміў, што ў раёне працягваецца збор грошай на ўстаноўку новых прыпынкаў грамадскага транспарту і папрасіў грамадзян далучыцца.
«На сёння сабрана каля 31 тысячы рублёў. Просьба ўсім — як грамадзянам, так і прадпрыемствам і арганізацыям — прыняць актыўны ўдзел у зборы сродкаў. Любая сума будзе вітацца», — сказаў Шарай у сваім звароце.
Пад відэа размешчаны рэквізіты для пераводу грошай — рахунак УКПП «Камунальнік», які адказвае за ЖКГ у Крычаве і раёне. У прызначэнні плацяжу просяць пазначыць: «Дапамога на добраўпарадкаванне горада».
Ініцыятыва мясцовых уладаў выклікала дыскусію ў каментарах. Многія выказалі абурэнне — чаму фінансаванне базавых інфраструктурных патрэб кладзецца на плечы грамадзян? Гэта ж адна з функцый мясцовых органаў улады, якая фінансуецца з бюджэту, у тым ліку за кошт падаткаў людзей.
«Вось так вось і жывём, падаходны падатак, прафсаюзны, пенсійны, падатак за нерухомасць, зямлю, транспартны падатак, падатак за жывёл, на пошту ідзеш плаціць камуналку альбо на мабільны пакласці — заплаці камісію, дзіцячы сад аплаці, за падручнікі плаці, і г. д, за ўсё плацім, мала яшчэ — просяць на прыпыначныя павільёны, проста няма слоў, адны эмоцыі».
«Прапаную заканадаўча плаціць за паветра… 30% нашых заробкаў пойдуць нам на карысць, бацька ведае, куды іх патраціць».
«А вы ЖКГ аштрафуйце за някошаную траву, толькі не на 20 б.в. як прыватны двор, а ў пяціразовым памеры за кожны лішні сантыметр, вось і будуць вам грошы на добраўпарадкаванне горада!»
«Дзяржава з мяне штомесяц падаходны падатак атрымлівае, з якога ніта я яму яшчэ нешта вінен?» — «Скажу больш: яшчэ і з кожнай вашай пакупкі ў краме дзяржава атрымлівае ПДВ».
«Прашу вышэйстаячых чыноўнікаў пабудаваць прыпынкі за кошт работнікаў райвыканкама, пазбавіць іх прэмій, а сродкі накіраваць на павільёны».
«А я збіраю на дачу. Плачу сумленна падаткі. Мне райвыканкам не дапамагае зусім!»
«А навошта тады дзяржава падаткі збірае і кожны год новыя прыдумляе?» — «На заробкі міністраў». — «Сям'я ж расце. А на гэта трэба больш золата».
«Можа лепш дзеткам дапамагчы са зборамі на вакцыны??? А прыпынкі пачакаюць».
«Людзі ў садок здаюць грошы, у школы, у бальніцы плацяць, а тут яшчэ на прыпынкі давай».
«А потым скінемся і купім аўтобусы, і адразу падымуць цану за праезд», — пішуць у каментарах.
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль7
Каментары