Ці выгадна мець электрамабіль у Беларусі? Распыталі ўласнікаў

Volvo xc40

Уласнік шведскага электрамабіля Volvo xc40 жыве ў прыватным доме, таму зараджае яго ад хатняй разеткі па 0,2969 рубля за кВт·гадзіну.

Паводле слоў аўтамабіліста, калі на вуліцы больш за 15 градусаў, 100 кіламетраў прабегу ў змяшаным рэжыме абыходзяцца яму ў 7 рублёў 30 капеек. Зімой у залежнасці ад тэмпературы цана 100 км прабегу складае ўжо каля 10 рублёў.

Калі зараджаць паркетнік на грамадскіх зарадных станцыях, кошт 100 кіламетраў прабегу вырастае ў два разы: да 15 рублёў пры зарадцы на хуткай станцыі (па 0,61 рубля за кВт·г) або да 11,3 рубля, калі карыстацца павольнымі станцыямі падзарадкі з тарыфам 0,46 рубля за кВт·г.

У халодны перыяд, адпаведна, гэта будзе ўжо ад 15 да 20 рублёў за 100 км прабегу.

Аднак уласнік электрамабіля сцвярджае, што электракар — гэта не пра эканомію, а пра новыя ўражанні і тэхналогіі.

Пакупкай электрамабіля ён задаволены, хоць у сям’і ёсць яшчэ адно аўто — бензінавае, якое выкарыстоўваецца для дальніх паездак.

Павялічыць

BMW i3

Уласніца электрычнай BMW i3 кажа, што яе машына спажывае ад 15 да 25 кВт·г на 100 кіламетраў — у залежнасці ад тэмпературы і стылю язды.

Дзяўчына зараджае аўтамабіль на грамадскіх зарадных станцыях, бо жыве ў кватэры. Па магчымасці выбірае хуткія зарадкі (па 0,61 рубля за кВт·г), таму 100 кіламетраў прабегу ёй абыходзяцца ў 9—15 рублёў.

Cучасныя дызельныя аўто падобнага памеру з'ядаюць па 4-5 літраў дызелю на 100 км па трасе (10-13 рублёў) і 6-7 літраў па горадзе (15-18 рублёў). 

Voyah Free

Яшчэ адзін суразмоўца ездзіць на Voyah Free. У адрозненне ад вышэйзгаданых электрамабіляў Voyah мае ў дадатак 1,5-літровы бензінавы рухавік і з’яўляецца паслядоўным гібрыдам, бо колы прыводзяцца ў рух выключна электрарухавіком.

Бензінавы рухавік тут выконвае ролю генератара, які зараджае батарэю.

Паводле слоў уласніка, выключна на батарэі машына можа праехаць каля 140 кіламетраў у цёплы перыяд і каля 100 кіламетраў зімой.

Павялічыць

Па падліках мужчыны, у сярэднім яго аўто спажывае каля 28 кВт·г на 100 кіламетраў. Паколькі ён жыве ў кватэры, то зараджаецца на грамадскіх зарадных станцыях. На хуткай зарадцы атрымліваецца каля 17 рублёў за 100 км, на павольнай — 13 рублёў за сотню.

Аўтамабіліст прызнаецца, што не заўсёды знаходзіць час на зарадку, таму часта ездзіць па горадзе выключна дзякуючы бензінаваму рухавіку-генератару.

Паколькі запас ходу ў Voyah Free без падзарадкі невялікі, на вялікіх адлегласцях амаль увесь час працуе бензінавы рухавік. У выніку сярэдні расход паліва па трасе складае 9 літраў на 100 кіламетраў, а гэта ўжо 23,4 рубля за сотню. 

Вынікае, што эканомія на паліве ў выпадку з электрамабілямі ці паслядоўнымі гібрыдамі не такая ўжо вялікая, калі даводзіцца зараджаць машыну на грамадскіх зарадках, а не ад хатняй разеткі.

Для параўнання, дызельная Volvo xc 90 з 2-літровым рухавіком спажывае па трасе ў раёне 7-7,5 літра дызелю, што ў выніку выліваецца ў 18-20 рублёў на 100 км прабегу.

Аўто на метане больш эканамічныя?

А калі параўноўваць з машынамі, што працуюць на метане, то эканомія на паліве ў электрамабіляў амаль знікае.

Напрыклад, 100 кіламетраў у змяшаным рэжыме на мікралітражцы VW Up з літровым рухавіком, якая па заводскіх характарыстыках працуе не толькі на бензіне, але і на метане, абыходзяцца ў 5—5,5 рубля.

А 100 кіламетраў на Seat Leon з рухавіком 1,4 літра каштуюць 5 рублёў пры яздзе па трасе і 6,5—7 рублёў у гарадскіх умовах.

Такім чынам, метанавыя аўтамабілі з пункту гледжання расходаў на паліва выглядаюць больш выгадна, чым электрамабілі. Пры гэтым яны яшчэ і даволі экалагічныя.

Павялічыць

Бадай адзіны мінус аўто на метане — колькасць заправачных станцый. Па ўсёй краіне іх усяго 27: чатыры знаходзяцца ў Мінску, па дзве — у кожным абласным цэнтры, акрамя Віцебска, дзе метанавая запраўка толькі адна. Таму тым, хто жыве ў такіх гарадах, як Полацк ці Наваполацк, пра эканомію на паліве застаецца толькі марыць.

• 4
• 0
• 8
• 2
• 0
• 1
• 0
• 0