Дзяржсакратар ЗША: Мы праверым, наколькі шчыра ў Крамлі хочуць спынення вайны
Дзяржсакратар ЗША Марка Рубіа ў сераду ў інтэрв’ю тэлеканалу Fox News назваў будучае падпісанне пагаднення аб карысных выкапнях паміж Вашынгтонам і Кіевам «добрай і важнай здзелкай».
Рубіа адзначыў, што галоўным у працы над гэтай дамовай з амерыканскага боку быў міністр фінансаў Скот Бесэнт, які, паводле яго слоў, «прарабіў велізарную працу», і цяпер «да фінішу застаўся апошні рывок», піша «Голас Амерыкі».
«Так што мы блізкія да мэты, і гэта добра, — сказаў Рубіа. — Мы па-ранейшаму хочам пакласці канец гэтай вайне».
Дзяржсакратар ЗША не стаў каментаваць публікацыі розных СМІ пра разыходжанні паміж Дональдам Трампам і Уладзімірам Зяленскім і адсутнасць камунікацыі паміж імі, але пацвердзіў, што «пагаварыўшы з Пуціным, з якім ён (Трамп) не размаўляў чатыры гады, прэзідэнт Трамп адразу ж патэлефанаваў Зяленскаму».
«Я прысутнічаў пры абедзвюх размовах, — расказаў Рубіа. — Трамп без прамаруджання патэлефанаваў Зяленскаму, а пасля Зяленскі сустрэўся з нашым міністрам фінансаў, потым са мной і віцэ-прэзідэнтам, а потым з Келагам… Таму казаць пра тое, што мы не ўзаемадзейнічаем з імі, — гэта проста няпраўда».
Марка Рубіа прызнаўся, што да канца не ўпэўнены, наколькі шчыра ў Крамлі жадаюць спынення вайны.
«Мы гэта праверым, — заявіў дзяржсакратар ЗША. — Мы спыталі іх: паслухайце, сябры, вы хочаце пакласці канец вайне ці працягваць яе? Калі вы хочаце спыніць вайну, мы можам абмеркаваць, што для гэтага трэба… Калі вы хочаце працягваць вайну, так і скажыце. І яны пагадзіліся працягнуць абмеркаванне… Калі тое, на чым яны настойваюць, нерэалістычнае, то мы зразумеем, што яны насамрэч не ацэньваюць сітуацыю рэалістычна».
Рубіа падкрэсліў, што прэзідэнт ЗША Дональд Трамп «умее дамаўляцца» і «не дазволіць уцягнуць сябе ў нявыгадную здзелку».
У гэтым інтэрв’ю кіраўнік Дзярждэпартамента яшчэ раз паўтарыў, што еўрапейскія краіны-члены НАТА «павінны інвеставаць у сваю нацыянальную бяспеку».
«Аднак яны гэтага не робяць, — сказаў Рубіа. — Гэтыя краіны трацяць на гэта ад паўтара да аднаго працэнта (свайго ВУП), і мы проста не можам працягваць субсідаваць усё гэта. Гэта несправядліва і больш не можа так працягвацца. Бо адзінае, што ставіць НАТА пад пагрозу, — гэта тое, што ў некаторых нашых саюзнікаў па НАТА амаль няма ўзброеных сіл, альбо яны не вельмі баяздольныя, таму што на працягу 40 гадоў яны ўвогуле не ўкладвалі сродкі ў гэта. НАТА — гэта былі ЗША».
Каментары
Не лепш ганарар Ілона з акладамі скарачае
Свае мэты Пуцін не хавае - капітуляцыя Ўкраіны і ліквідацыя яе як дзяржавы. Потым на чарзе мы і Казахстан, потым краіны Балтыі...
Такія ж мэты і ў Трампа