ЗША ўзгаднілі перадачу Украіне крылатых ракет вялікай далёкасці для F-16 — Reuters

Са слоў суразмоўцаў выдання, канчатковае рашэнне яшчэ не прынятае. У выпадку станоўчага адказу Кіеву прыйдзецца чакаць некалькі месяцаў, паколькі ЗША вырашаюць «тэхнічныя праблемы», звязаныя з перадачай ракет.

Ракеты JASSM да гэтага часу ставілі толькі на самалёты, распрацаваныя ў ЗША — у прыватнасці, на знішчальнікі F-16, атрыманыя Украінай. Кожны такі самалёт можа несці па дзве ракеты).

Па словах аднаго з суразмоўцаў Reuters, рабіліся спробы зрабіць ракету прыдатнай для выкарыстання са знішчальнікамі іншага паходжання, але інфармацыі пра тое, якія самалёты з украінскага арсенала падыдуць для гэтага, няма. Украінскія вайскоўцы, як адзначае Reuters, эксплуатуюць савецкія самалёты МіГ-29, Су-24 і Су-27.

Вайсковыя аналітыкі і эксперты адзначаюць, што адпраўка JASSM ва Украіну можа істотна змяніць ход канфлікту, паколькі вялікая частка Расіі апынецца ў зоне дасяжнасці высокадакладных боепрыпасаў.

Гэта можа прымусіць расійскіх вайскоўцаў адсунуць плацдармы і склады забеспячэння на сотні кіламетраў углыб тэрыторыі.

Запуск ракет з пунктаў паблізу паўночнай мяжы Украіны можа дазволіць ім паражаць вайсковыя аб'екты на адлегласці аж да Варонежа і Бранска. На поўдні, сканцэнтраваўшы іх паблізу лініі фронту, можна нанесці ўдары па аэрадромах або ваенна-марскіх аб'ектах у Крыме.

Старыя мадэлі JASSM ад Lockheed Martin Corp маюць далёкасць дзеяння каля 230 міль (370 км). Ракеты даўжынёй каля 14 футаў (4 м) цяжка выявіць радарам. Яны таксама могуць лётаць блізка да зямлі і могуць быць запраграмаваныя на звілістыя маршруты для абыходу сродкаў СПА.

Існуе таксама больш дальнабойная ракета JASSM, здольная праляцець больш за 500 міль. Кожная JASSM абсталяваная вялікай 1000-фунтавай боегалоўкай, але, у адрозненне ад ракет Storm Shadow і Scalp, яна не прызначаная для ўдараў па бункерах.

Найноўшыя версіі каштуюць каля 1 мільёна даляраў кожная. Навядзенне робіцца з дапамогай сігналаў глабальнай сістэмы пазіцыянавання (GPS) і інерцыйнай навігацыйнай сістэмы. Калі ракета набліжаецца да цэлі, інфрачырвоны шукальнік дапамагае накіраваць яе ў пункт паражэння з дакладнасцю каля 10 футаў (3 м).

Аднак жа пакуль забарона на ўдары па цэлях у глыбіні Расіі амерыканскай зброяй па-ранейшаму застаецца ў сіле. Адміністрацыя Джо Байдэна асцерагаецца, што зняцце абмежаванняў справакуе Расію на яшчэ больш агрэсіўныя дзеянні ў дачыненні да Украіны. 

Па словах супрацоўніка амерыканскага Кангрэса, факт перадачы Украіне ракет JASSM будзе далей ціснуць на Вашынгтон, каб зняць абмежаванні на выкарыстанне амерыканскай зброі для ўдараў па тэрыторыі Расіі.

• 14
• 0
• 0
• 1
• 0
• 0
• 0
• 0