На думку прэзідэнта Украіны Уладзіміра Зяленскага, пашырэнне ЕС павінна выйсці за пералік дзяржаў, якія ўжо маюць статус кандыдата, яно павінна таксама ахапіць Беларусь. Пра гэта ён заявіў на супольнай прэс-канферэнцыі з прэзідэнтам Еўрапарламента Рабертай Метсолай у Кіеве на Дзень Еўропы, паведамляе «Еўрапейская праўда».
Уладзімір Зяленскі падкрэсліў, што Украіна чакае крокаў Еўрасаюза, неабходных для пачатку ўступных перамоваў з Украінай, але пашырэнне павінна тычыцца і іншых еўрапейскіх дзяржаў.
«Мы выканалі ўсе ўмовы для таго, каб у чэрвені была зацверджаная перамоўная рамка і рэальна пачаліся перамовы аб уступленні Украіны ў Еўрасаюз. Гэтак жа важна, каб для іншых народаў, якія заслугоўваюць быць у Еўрасаюзе — еўрапейскае адзінства сапраўды працавала, каб яны таксама рэалізавалі свой кандыдацкі статус», — растлумачыў Зяленскі.
Прэзідэнт Украіны таксама акрэсліў пералік дзяржаў, якія ён бачыць у складзе будучага Еўрасаюза.
«Еўропа — гэта і Балканы, і Малдова, і будзе абавязкова Дзень Еўропы для Грузіі і Дзень Еўропы для Беларусі», — заявіў ён, упершыню абвясціўшы бачанне Украіны адносна будучага ўступлення Беларусі ў ЕС.
Характэрна, што ў гэтым пераліку дзяржаў ён не назваў Турцыю, якая фармальна мае статус краіны-кандыдата, але перамовы з якой спыненыя.
Зяленскі таксама дадаў, што гэтую пазіцыю падзяляюць і прадстаўнікі Еўрапейскага парламента.
«Усё гэта ўжо адлюстравана пазіцыямі Еўрапарламента, і сапраўды важна ўсё гэта рэалізаваць», — падкрэсліў ён.
Цяпер чытаюць
Расійскі рэпер Ягор Крыд зняўся ў майцы з выявай героя фільма «Ідзі і глядзі», якому дамалявалі пірсінг і татуіроўкі. Цішотку выпусцілі крама беларускі1010
Каментары