Мінчанін скраў у пʼянага незнаёмца 12 тысяч даляраў, гуляў на іх тыдзень, а папаўся на скрадзенай бутэльцы піва
Пакручастую крымінальную гісторыю нечаканых лёгкіх грошай і такога ж рэзкага павароту фартуны, расказвае «Мінск-Навіны».
У тую ноч мінчанін распіваў спіртныя напоі ў гасцях у прыяцеля. Пасля яны адправіліся на аўтазаправачную станцыю ў Масюкоўшчыне па гарэлку.
На зваротным шляху адзін з мужчын адышоў справіць патрэбу і заўважыў на газоне грамадзяніна, той спаў, побач стаяла сумка.
У сумцы быў пачак даляраў, пашпарт і туалетная вада. Пакінуўшы дакумент і парфуму побач з незнаёмцам, мужчына забраў сумку з грашыма.
Але прыяцелі ўсумніліся ў сапраўднасці купюр і папрасілі неахайнага выгляду мужчыну, што праходзіў міма, праверыць 100-даляравую банкноту ў касіра АЗС. Работнік станцыі пацвердзіў: «сапраўдная». Таварышы расшчодрыліся і аддалі мінаку гэтыя грошы.
Абмяняўшы 300 даляраў, прыяцелі на таксі паехалі ў саўну, выклікалі туды дзяўчат лёгкіх паводзін і «сталі адпачываць, ні ў чым сабе не адмаўляючы».
Тыдзень абвінавачаны траціў скрадзеныя грошы, некаторую частку з іх ён перадаў прыяцелю — шматдзетнаму бацьку. Але хутка сродкі скончыліся.
Мінчук папаўся на тым, што ўзяў у краме на вул. Нёманская двухлітровую бутэльку піва і накіраваўся да выхаду, не расплаціўшыся. Яго заўважыў ахоўнік, але мужчына ўцёк. Аднак быў затрыманы міліцыяй.
Падчас следства высветлілася гісторыя мужчыны, што спаў на газоне, у сумцы якога і былі 12 тысяч даляраў. Аказалася, ён планаваў на іх набыць аўтамабіль.
Аднак здзелка не адбылася: мужчына сустрэўся са знаёмай і выпілі столькі гарэлкі, што дайсці дадому ён быў не ў стане і заснуў проста на газоне.
Мужчыну, які пражыў прыгожы тыдзень на 12 тысяч даляраў, асудзілі на 3 гады 6 месяцаў калоніі са штрафам у памеры 100 базавых велічынь (4 000 рублёў). Акрамя таго, ён павінен кампенсаваць пацярпеламу нанесеную шкоду.
Каментары