Ваш знаёмы знянацку зноўку зарэгістраваўся ў тэлеграме? Вас могуць чакаць праблемы, калі яму напішаце
На іншым баку можа быць губазікавец або кэдэбіст.
Экспертам Media IQ сталі вядомыя два выпадкі, калі нехта перастварыў акаўнт двух беларусаў замежжа на іх старых беларускіх нумарах. Адметна, што ў іх былі актыўныя сім-карты ў роўмінгу, за якія яны плацілі, а тэлеграм-акаўнты яны загадзя перанеслі на замежныя нумары.
Беларускія спецслужбы і раней захоплівалі такім чынам тэлеграм-акаўнты беларусаў шляхам дублявання сім-картаў. Але гэта бадай першы выпадак, калі акаўнты хутка атрымалася вярнуць назад праз смс — імаверна, сілавікі, якія рэгістравалі акаўнты, не спраўдзілі, што нумары яшчэ актыўныя.
Выявілася, што значная частка знаёмых не пераправярае, хто з імі на сувязі з новастворанага акаўнта і адразу дасылаюць на яго прывітанні. Адзін з людзей, які знаходзіцца ў Беларусі, нават нагадаў, што яны пазнаёміліся падчас жнівеньскіх пратэстаў.
Таму калі нехта з вашых кантактаў раптам зноўку рэгіструе акаўнт у тэлеграме, не спяшайцеся вітацца. Не распавядайце нічога пра сябе, але папрасіце чалавека пацвердзіць сваю асобу. Або напішыце знаёмаму ў іншай сацсетцы або месенджары, або, калі ваш акаўнт добра абаронены, запытайцеся, хто на сувязі і папрасіце яго даслаць відэапаведамленне.
Эксперты таксама раяць людзям, у якіх ёсць актыўны беларускі нумар, пры пераносе тэлеграма на замежны нумар пераствараць акаўнт на беларускім нумары і адразу ж уключаць у ім двухфактарную аўтэнтыфікацыю. Так можна ўскладніць сілавікам махінацыі.
Калі ж чалавек даўно за мяжой, але ягоны беларускі нумар у вашых кантактах зноўку зарэгістраваўся, то пераправярайце двойчы. І асабліва, калі ён актывіст, журналіст або іншая публічная асоба.
«Наша Нiва» — бастыён беларушчыны
ПАДТРЫМАЦЬ
Джон Коўл прыедзе ў Беларусь 15 верасня. Лукашэнка, аднак папярэдзіў: «вялікай здзелкі» не будзе11
Каментары