З пачатку новага навучальнага года супрацоўнікі Дэпартамента аховы атрымалі права праводзіць у школах выбарачны надгляд асабістых рэчаў і заплечнікаў навучэнцаў. Як гэтая працэдура працуе на практыцы, паказалі на прыкладзе гімназіі № 1 Віцебска.
У відэа выдання «Віцьбічы» дэманструюць, што праверка навучэнцаў носіць выбарачны характар. Так, з трох хлопчыкаў, якія праходзяць праз турнікет на ўваходзе, увагу ахоўніка прыцягвае толькі адзін.
На наступных кадрах бачна, што вучань стаіць насупраць чатырох дарослых: імаверна, настаўніцы і трох асоб у форме. Адзін з мужчын просіць адкрыць заплечнік. Настаўніца і два супрацоўнікі Дэпартамента аховы нахіляюцца і зазіраюць унутр. Пры гэтым адзін з ахоўнікаў рукой прытрымлівае край заплечніка, а іншай падсвечвае змесціва кішэнным ліхтарыкам. Чуваць, як ён просіць вучня прыпадняць і адсунуць падручнікі.
Мэты і падрабязнасці новаўвядзення растлумачыў начальнік Віцебскага абласнога ўпраўлення Дэпартамента аховы, палкоўнік міліцыі Сяргей Мурашкін. Паводле яго слоў, надгляд уведзены ў адпаведнасці з пастановай Савета міністраў для павышэння бяспекі ва ўстановах адукацыі, дзе нясуць службу супрацоўнікі ведамства.
Мурашкін адзначыў, што надгляд праводзіцца абавязкова ў прысутнасці педагагічных работнікаў і гэта «не пакаранне»:
«Гэта не для таго, каб кагосьці там пакрыўдзіць ці не прапусціць у навучальную ўстанову. Надглядавыя мерапрыемствы — гэта бяспека непасрэдна дзетак, непасрэдна педагогаў. І такія меры мы будзем праводзіць. Выбарачна, зразумела, гэта не ў дачыненні да кожнага навучэнца».
Як запэўніў Мурашкін, увесь персанал прайшоў практычную і тэарэтычную падрыхтоўку, таму кожны ахоўнік на пасту ведае дакладны алгарытм дзеянняў, каб пазбягаць канфліктных сітуацый.
Расказаў міліцэйскі начальнік і пра тое, што будзе ў выпадку выяўлення забароненых прадметаў:
«Асобы будуць вывучацца, будзем паведамляць бацькам гэтую інфармацыю, ну і будзем разбірацца ў цэлым далей, каб такіх фактаў не было».
Цяпер чытаюць
Хто з палітвязняў выйшаў на свабоду 16 верасня ПОЎНЫ СПІС10
Каментары