«Сказаў таварышу: «Я сам дам рады». Футбаліст, які выратаваў жанчыну, расказаў, як усё адбылося
Кірыл Нехін, што гуляе ў клубе другой лігі «Агра-Пелішча», улетку выратаваў чалавека, што тануў. Кірыл адпачываў на пляжы ў Брэсце, калі здарылася гэта гісторыя.
Хлопец без ваганняў кінуўся ў ваду, каб выратаваць чалавека. Ён расказаў у інтэрв'ю Betnews пра абставіны гісторыі.
«Мы сабраліся ноччу кампаніяй на Красным Двары (прыгарад Брэста). Нас было чалавек 15. Пад раніцу мы з некаторымі сябрамі вырашылі пасядзець на лежаках, якія знаходзіліся каля берага. Там мы пазнаёміліся з іншай кампаніяй, якая адпачывала побач. Сядзелі, класна размаўлялі, усё было добра. А потым жанчына з той другой кампаніі вырашыла паплаваць у возеры. Плыве, плыве і сама не заўважыла, як адплыла метраў на 50 ад берага… І я ўжо зразумеў, што сама яна адтуль не выберацца: яе пачало кідаць — галава то пад вадой, то над вадой. І нічога не заставалася, як хутка плыць і ратаваць чалавека. Увогуле не думаў, што калі-небудзь апынуся ў падобнай сітуацыі», — кажа Кірыл.
Кірыл не толькі футбаліст, але і настаўнік фізкультуры ў школе, плаваць навучыўся ў школе. вучылі плаванню ва ўніверсітэце на факультэце фізічнага выхавання.
Ён кажа, што спачатку паплыў не ён, а яго знаёмы Ігар, які першы гэта ўбачыў.
«Ён па целаскладзе такі худзенькі, і яму самому было цяжка. А следам плыў я. Я Ігару сказаў: «Плыві на бераг, я сам дам рады», — зазначыў хлопец.
Кірыл адзначае, што сваякі не чакалі ад яго такога самаадданага ўчынку, але сам сябе героем не адчувае.
Яго каманда «Агра-Пелішча» гуляе ў Камянцы — у другой лізе чэмпіянату Беларусі. Зараз выйшла ў другі этап і спрабуе пазмагацца за павышэнне ў класе.
«Жыхары Камянца [на матчы] прыходзяць, з Брэста людзі прыязджаюць. Плюс сем'і футбалістаў. Калі мы гуляем на штучным полі, то ў сярэднім прыходзіць па 50 чалавек. Калі на натуральным — чалавек 120», — кажа ён.
Асноўная яго праца — настаўнік фізкультуры ў школе.
«Булінгу няма. У мяне ўрокі праходзяць пры дысцыпліне. Дзеці ведаюць, чаго я ад іх хачу, і гэта выконваюць. Усім усё падабаецца. Далёка не ўсе ведаюць, што я гуляў у «Руху», быў капітанам дубля «Дынама» Брэст. Але ёсць і тыя, хто ведае, цікавіцца тым жа ФК «Агра-Пелішча. Пытаюцца парады. Для тых, хто ведае, — напэўна, крута, што я футбаліст», — зазначыў Кірыл.
— Што вучні сказалі, даведаўшыся пра ваш гераічны ўчынак?
— Сказалі: «Кірыл Дзмітрыевіч, вы, вядома, малайчына». Мне прыемна.
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2626
Каментары