На БТ расказалі сваю версію, чаму затрымалі магілёўца, які вярнуўся з-за мяжы
Нядаўна праваабаронцы паведамлялі пра Аляксандра Кулікова, якога затрымалі пасля вяртання ў Беларусь і асудзілі. У эфіры БТ цяпер расказалі, у чым падазраюць мужчыну.
Аляксандру Кулікову 53 гады. Ён з Магілёва, працаваў там начальнікам аховы з 2002 года. Год таму мужчыну затрымалі за, як ён кажа ў сюжэце, размяшчэнне неанацысцкай сімволікі ў «Аднакласніках».
Пазней, апавядае Кулікоў, ён выехаў у Польшчу, там запісаўся ў Полк Каліноўскага. Узяў пазыўны «Ленакс» у гонар баксёра Ленакса Льюіса.
Паказалі кадры яго затрымання па вяртанні з Варшавы. Мужчына там расказвае, што прыехаў у Беларусь, бо трэба было павырашаць пытанні, ды і ўвогуле цягнула дадому.
У сюжэце сцвярджаецца, што Аляксандр цяпер пад следствам па падазрэнні ў найміцтве і ўдзеле ў дзейнасці тэрарыстычнай арганізацыі.
Раней MAYDAY.TEAM паведамляла, што Аляксандр пакінуў Беларусь у маі 2023 года, пасля завядзення на яго крымінальнай справы за каментары ў адным з чатаў, прызнаных сілавікамі «экстрэмісцкім».
Перад гэтым, 6 красавіка, на Кулікова склалі адміністрацыйны пратакол па арт.19.11 КаАП і прысудзілі адміністрацыйны арышт.
Калі Кулікоў быў за мяжой, яму, як расказвалі праваабаронцам, патэлефанавала састарэлая маці, якая паведаміла, што ёй тэлефанаваў следчы і пагражаў вышукам сына.
Было абяцана, што калі Кулікоў вернецца, то яму будзе абраная мера пакарання, не звязаная з пазбаўленнем волі.
Праз нейкі час Кулікоў вырашыў вярнуцца ў Беларусь і быў затрыманы. На сувязь ён перастаў выходзіць падчас перасячэння мяжы.
На яго склалі яшчэ адзін пратакол аб адміністрацыйным парушэнні (арт. 19.11 КаАП) і завялі крымінальную справу за абразу Аляксандра Лукашэнкі і паклёп на яго, як паведамлялі праваабаронцы.
Суд Ленінскага раёна Магілёва прызнаў магілёўца вінаватым і асудзіў да трох гадоў пазбаўлення волі з накіраваннем у калонію ва ўмовах агульнага рэжыму.
Выглядае, што цяпер Кулікова будуць судзіць і па іншай крымінальнай справе, звязанай з абвінавачаннем ва ўдзеле ў Палку Каліноўскага.
Цяпер чытаюць
«Бяда, на вялікі жаль, ужо ступае на парог Сінявокай». Ультыматум Зяленскага Лукашэнку: што будзе далей?83
Каментары