Стаматолаг з Капыля запярэчыў чыноўнікам: Зніжаць цэны — мы пацерпім страту
Сваім меркаваннем пра немагчымасць знізіць цэны на стаматалагічныя паслугі падзяліўся доктар з райцэнтра.
Выконваючы абавязкі загадчыка стаматалагічнага аддзялення Капыльскай цэнтральнай раённай паліклінікі Уладзімір Дварэцкі ў тыкток-канале @konylnews заўважыў, што не вельмі згодны з пастановай Мінздароўя, якая зніжае цэны на стаматалогію.
Абгрунтоўваючы сваю пазіцыю, доктар адзначыў, што цэны і так нізкія. Ён прывёў прыклады: ацэталавы пратэз — недзе 360 рублёў, пластмасавая каронка — 50-55 рублёў, просты здымны пратэз — ад 165 рублёў.
Прэйскурант на лячэнне зубоў у платным кабінеце, па словах Дварэцкага, таксама даступны. У сярэднім пломба на аднакарнявы абыдзецца ў 50-60 рублёў, на шматкарнявы — у 100-110.
«Зніжаць цэны — фактычна гэта пацерпім страту мы і ўсе», — лічыць Дварэцкі і распавядае, што дактарам з лета павялічылі планы на 20 працэнтаў пры захаванні таго ж узроўню цэнаў.
Доктар звяртае ўвагу, што выкананню планаў не спрыяе змяншэнне колькасці кліентаў. «Калі я пачынаў у 1981 годзе працаваць, было ў раёне 62,5 тысячы насельніцтва. Цяпер — каля 27 [тысяч]. Таму і менш людзей прыходзіць. У асноўным людзі пенсійнага ўзросту».
У паліклініцы, па словах Дварэцкага, не робяць металакераміку. «Раней можна было ўсё гэта, але [цяпер не] не па нашай віне. Гэта ўсё па іншых прычынах», — заўважыў доктар без канкрэтызацыі.
Але ў каментарах людзі выказалі сваю нязгоду з меркаваннем, што цэны нізкія.
«Дядзя, ты гоніш. У нас заробак 500 р. Я сабе нават проста камень пачысціць не магу», — піша адзін карыстальнік.
«Паважаны, вы пра што гаворыце, у людзей на перыферыі з/п. 500-700, вы думаеце, як людзям? Яны не ў сілах пацягнуць і вашыя дзярж. цэны на пратэзы», — заўважае іншы.
«Ніфіга сабе нізкія, дзядзя, ты чаго гародзіш??» — дадае яшчэ адзін.
«Пры пенсіі 530, пломба ад 110, а калі не адна, а доктар яшчэ да гэтай пломбы знойдзе яшчэ што-небудзь, заплаці камуналку і жабруй», — падлічвае наступны.
Іншыя заўважылі, што доктар не прывёў цэны на спадарожныя паслугі: «Да каронкі, каб падрыхтаваць рот, трэба столькі аплаціць, што галава хістаецца… Пломба 110, а там пульпіт, а лякарства пакласці, а ўкалоць, абязболіць…»
«Зменшыўся паток людзей??? Людзі баяцца цэн», — дадае іншы.
Яшчэ адзін карыстальнік прапанаваў: «Калі гаварыць, што цэны нізкія, то трэба агучыць і сярэдні заробак у Капылі».
Некаторыя выказваліся пра дактароў і іх заробкі: «Ні адзін стаматолаг не жыве ў галечы, жывуць дай Бог кожнаму. Паспрабуйце нашы з/п. За стаматолагаў даўно трэба дзяржаве брацца». «Ну яму танна, бо з/п у яго нармальная. А пра астатніх ён не думае». «Па сваіх заробках глядзяць, а просты рабацяга са сваім заробкам што можа палячыць». «Няхай агучыць свой заробак. Што для яго і так нізкія цэны і зніжаць няма куды!»
Некаторыя звярталі ўвагу, што ў дзяржаўных стаматалогіях цэны яшчэ больш-менш, а вось у прыватных вельмі дорага.
Сярод вялікай колькасці каментароў можна адшукаць толькі некалькі, якія пагаджаюцца з меркаваннем: «Я нядаўна лячыла зубы, нармальныя цэны, складаны зуб 150 р, проста карыес 50. Што цяпер купіш на 50 р».
Чытайце яшчэ:
Сучасныя методыкі ў доглядзе зубоў: распавядаюць перадавыя мінскія стаматолагі
Літва зноў зачыніла мяжу з Беларуссю — ізноў шары з кантрабандай9
Каментары
вось гэта лехтарат..(