Пацыент, які адчувае недамаганне, і пры адсутнасці павышанай тэмпературы можа атрымаць бальнічны, распавёў галоўны доктар Брэсцкай абласной клінічнай бальніцы Аляксандр Карпіцкі, піша БелТА.
Ён пацвердзіў, што вонкавыя прыкметы — слёзацячэнне, закладзенасць носа, пачырваненне горла — з'яўляюцца падставай для таго, каб бальнічны быў выдадзены нават у тым выпадку, калі ў пацыента няма павышанай тэмпературы. «Тэмпература — гэта адзін з сімптомаў, які бывае пры прастудных, вірусных захворваннях», — сказаў Аляксандр Карпіцкі.
Каментуючы меркаванне аб тым, што работніку выдаюць бальнічны толькі пры наяўнасці павышанай тэмпературы, ён заўважыў, што ніякіх інструкцый дзейнічаць такім чынам у медыкаў няма.
«Пачынаючы са студэнцкай лавы і далей падчас працы ніхто пра гэта не кажа. Мабыць, у народзе існуе такое меркаванне», — заўважыў ён.
Разам з тым, працягнуў Аляксандр Карпіцкі, часам на прыём да доктара прыходзяць несумленныя пацыенты, і гэта таксама трэба разумець. Калі доктар бачыць, што пацыент сімулюе, ён спытае ў яго пра тэмпературу.
Першы намеснік начальніка Галоўнага ўпраўлення па ахове здароўя Мінскага аблвыканкама Зіновій Гозман заўважыў, што пры выдачы лісткоў непрацаздольнасці сітуацыі разглядаюцца індывідуальна.
«Лісток непрацаздольнасці даецца і па клінічных, і па эпідэміялагічных паказаннях», — адзначыў ён.
У такіх выпадках медыкі могуць пацікавіцца, кім працуе пацыент. Адна справа, калі гэта айцішнік, які працуе дыстанцыйна з дому, іншая справа — выхавальнік у дзіцячым садку, якому бальнічны, відавочна, патрэбны, каб вылечыцца і не заражаць у гэты час дзяцей.
«Калі пацыент адчувае, што ён хворы, і яму не выдаюць лістка непрацаздольнасці, чаму ён не звяртаецца да загадчыка аддзялення або да начмеда паліклінікі? — задаўся пытаннем Зіновій Гозман. — У нас часта пацыенты пішуць адразу ў Міністэрства аховы здароўя. А пытанне вырашаецца вельмі проста. Загадчыкі аддзяленнем — гэта найбольш кваліфікаваныя дактары, якія вырашаюць такія сітуацыі».
Пры недамаганні з высокай тэмпературай Міністэрства аховы здароўя рэкамендуе не наведваць амбулаторна-паліклінічную службу, а выклікаць доктара на дом, пры вострых выпадках — хуткую медыцынскую дапамогу, дадаў намеснік міністра аховы здароўя, галоўны дзяржаўны санітарны доктар Беларусі Аляксандр Тарасенка.
«Медыцынская дапамога будзе аказана ўсім», — сказаў ён.
Цяпер чытаюць
Эйсмант: Лукашэнка не зможа паляцець на Саміт міру ў ЗША, бо паветраная прастора Еўропы для яго закрытая36
Каментары