У Зэльве судзяць мясцовага прадпрымальніка за паклёп і абразу Лукашэнкі
У будынку суда Зэльвенскага раёна 28 жніўня пачынаецца крымінальны працэс у дачыненні да Віктара Ламекі. Яго вінавацяць па двух артыкулах Крымінальнага кодэкса: ч. 2 арт. 367 (паклёп у дачыненні да Лукашэнкі) і ч. 2 арт. 368 (абраза Лукашэнкі), піша «Вясна».
Прадпрымальнік з Зэльвы, палітзняволены Віктар Ламека быў жорстка затрыманы 29 сакавіка і збіты пры затрыманні. Спачатку на яго склалі пратакол па адміністрацыйным артыкуле 19.11 КаАП Беларусі (распаўсюд экстрэмісцкіх матэрыялаў).
Не даўшы Ламеку нават пакінуць будынак суда, сілавікі зноў затрымалі яго і зноў склалі пратакол па арт. 19.11. Калі мужчына знаходзіўся ў следчым ізалятары, на яго склалі трэці пратакол.
Пазней стала вядома, што Ламека знаходзіцца ў СІЗА, яму выстаўлена абвінавачанне ўжо па крымінальных артыкулах. Пакуль мужчына быў у СІЗА, у яго памерла маці, піша «Гарадзенская вясна».
Яго ўтрымліваюць у СІЗА горада Баранавічы.
Віктар Ламека вядомы тым, што раней судзіўся з падатковай і бараніў прадпрымальнікаў з Гарадзеншчыны ў судах рознай інстанцыі.
Цяпер чытаюць
Адданага ябацьку, які абражаў Святлану Ціханоўскую ў Threads, кінулі за краты2
Каментары