У Башкартастане вайскоўцу далі пяць гадоў турмы за адмову ваяваць ва Украіне
Уфімскі гарнізонны вайсковы суд прысудзіў да пяці гадоў калоніі агульнага рэжыму 24-гадовага яфрэйтара Марсэля Кандарава, які адмовіўся адправіцца на вайну ва Украіну, вынікае з паведамлення прэс-службы судоў Башкірыі, піша Бі-бі-сі.
Вайскоўца абвінавацілі ва ўхіленні ад праходжання вайсковай службы працягласцю звыш аднаго месяца ў перыяд мабілізацыі, сказана ў паведамленні.
Летась у маі Кандараў, «не жадаючы прымаць удзел у спецыяльнай ваеннай аперацыі», не з'явіўся да месца службы, вызначыў суд. Яго затрымалі ў верасні.
Суд прызнаў Кандарава вінаватым у здзяйсненні злачынства, прадугледжанага ч. 5 арт. 337 КК РФ, яму прызначана пакаранне ў выглядзе пяці гадоў пазбаўлення волі з адбываннем у калоніі агульнага рэжыму. Прысуд яшчэ не набыў моц, значыць, можа быць абскарджаны.
Гэта новая норма, прынятая ў верасні ў пакеце «ваенных» паправак у Крымінальны кодэкс Расіі, звязаных з уварваннем ва Украіну. Пяць гадоў — мінімальны тэрмін, прадугледжаны ёй. Максімальны — 10 гадоў.
У канцы снежня той жа суд ва Уфе вынес прысуд па той жа ч. 5 арт. 337 КК РФ 27-гадоваму Салавату Мірасаву па справе аб самавольным пакіданні часці ў перыяд мабілізацыі, а ў канцы снежня стала вядома пра ваеннага, асуджанага на Камчатцы па іншай новай норме — ч. 2.1 арт. 332 КК РФ (невыкананне загаду начальніка ў перыяд ваеннага становішча, у ваенны час альбо ва ўмовах узброенага канфлікту). Гэтая норма прадугледжвае менш строгае пакаранне — да трох гадоў, і вайсковец Аляксей Брэвусаў атрымаў толькі год і восем месяцаў пазбаўлення волі ў калоніі-пасяленні.
Каментары
Не то что остальное стадо желудков узких.