Новыя фантазіі БТ: У Еўропе настаўнікаў прымушаюць называць усіх вучняў займеннікам «яно», а хто не пагаджаецца — таго арыштоўваюць
Лукашэнкаўскія прапагандысты, следам за расійскімі, перакруцілі гісторыю з Ірландыі, дзе арыштавалі настаўніка адной з мясцовых школ. Гісторыя праўдзівая, але БТ дадумала яе на свой капыл.
«У Ірландыі арыштавалі настаўніка за тое, што педагог называў хлопчыка хлопчыкам. Згодна з новаўвядзеннямі ў еўрапейскай адукацыі, там называюць усіх аднолькава — гендарна-нейтральным займеньнікам «яно» або «яны». Мужчыну затрымалі непасрэдна ў класе», — паведамляе БТ, спасылаючыся на Daily Mail.
Гісторыя гучыць дзіка, але ў першакрыніцы на Daily Mail усё па-іншаму.
Настаўніка з Ірландыі Інака Бёрка насамрэч арыштавалі, але не за тое, што ён адмовіўся называць вучня «яны», а за парушэнне судовага загаду.
Яшчэ ў маі школьнік, які знаходзіцца ў працэсе змены пола, і ягоныя бацькі папрасілі настаўніка выкарыстоўваць займеннік «яны» замест «ён». Пачалася спрэчка, у выніку якой настаўнік быў адхілены ад заняткаў. Спадар Бёрк не паслухаўся і працягваў прыходзіць у школу. Суд выпісаў загад, які забараняў яму прысутнічаць у школе, але настаўнік яго прынцыпова не выконваў. За непавагу да рашэння суда настаўніка і арыштавалі.
Настаўнік заявіў: «Трансгендарызм супярэчыць маёй хрысціянскай веры. Гэта супярэчыць Пісанням, супярэчыць духу Ірландскай царквы і маёй школы».
Суддзя ж сказаў, што ён выносіць рашэнне не па сутнасці аргументаў настаўніка адносна яго рэлігійных перакананняў або яго адхілення ад пасады, а на падставе парушэння судовага загаду.
Можна спрачацца, ці правільна зрабіла школа, што адхіліла настаўніка ад працы, але факт застаецца фактам: яго арыштавалі не за адмову называць школьніка канкрэтным займеннікам, як гэта сцвярджае БТ.
Больш за тое, сцвярджэнне, што еўрапейскіх школьнікаў цяпер трэба называюць усіх аднолькава, гендарна-нейтральным займеньнікам «яно» або «яны» — хлусня. Ніякіх такіх «новаўвядзенняў еўрапейскай адукацыі» няма. Ёсць канфлікт настаўніка і школы, якая папрасіла называць школьніка так, як ён хацеў, а настаўнік, кіруючыся сваімі прынцыпамі, адмовіўся.
Каментары