Novyja fantazii BT: U Jeŭropie nastaŭnikaŭ prymušajuć nazyvać usich vučniaŭ zajmieńnikam «jano», a chto nie pahadžajecca — taho aryštoŭvajuć
Łukašenkaŭskija prapahandysty, śledam za rasijskimi, pierakrucili historyju ź Irłandyi, dzie aryštavali nastaŭnika adnoj ź miascovych škoł. Historyja praŭdzivaja, ale BT dadumała jaje na svoj kapył.
«U Irłandyi aryštavali nastaŭnika za toje, što piedahoh nazyvaŭ chłopčyka chłopčykam. Zhodna z novaŭviadzieńniami ŭ jeŭrapiejskaj adukacyi, tam nazyvajuć usich adnolkava — hiendarna-niejtralnym zajmieńnikam «jano» abo «jany». Mužčynu zatrymali niepasredna ŭ kłasie», — paviedamlaje BT, spasyłajučysia na Daily Mail.
Historyja hučyć dzika, ale ŭ pieršakrynicy na Daily Mail usio pa-inšamu.
Nastaŭnika ź Irłandyi Inaka Biorka nasamreč aryštavali, ale nie za toje, što jon admoviŭsia nazyvać vučnia «jany», a za parušeńnie sudovaha zahadu.
Jašče ŭ mai školnik, jaki znachodzicca ŭ pracesie źmieny poła, i jahonyja baćki paprasili nastaŭnika vykarystoŭvać zajmieńnik «jany» zamiest «jon». Pačałasia sprečka, u vyniku jakoj nastaŭnik byŭ adchileny ad zaniatkaŭ. Spadar Biork nie pasłuchaŭsia i praciahvaŭ prychodzić u škołu. Sud vypisaŭ zahad, jaki zabaraniaŭ jamu prysutničać u škole, ale nastaŭnik jaho pryncypova nie vykonvaŭ. Za niepavahu da rašeńnia suda nastaŭnika i aryštavali.
Nastaŭnik zajaviŭ: «Transhiendaryzm supiarečyć majoj chryścijanskaj viery. Heta supiarečyć Pisańniam, supiarečyć duchu Irłandskaj carkvy i majoj škoły».
Sudździa ž skazaŭ, što jon vynosić rašeńnie nie pa sutnaści arhumientaŭ nastaŭnika adnosna jaho relihijnych pierakanańniaŭ abo jaho adchileńnia ad pasady, a na padstavie parušeńnia sudovaha zahadu.
Možna spračacca, ci pravilna zrabiła škoła, što adchiliła nastaŭnika ad pracy, ale fakt zastajecca faktam: jaho aryštavali nie za admovu nazyvać školnika kankretnym zajmieńnikam, jak heta śćviardžaje BT.
Bolš za toje, śćviardžeńnie, što jeŭrapiejskich školnikaŭ ciapier treba nazyvajuć usich adnolkava, hiendarna-niejtralnym zajmieńnikam «jano» abo «jany» — chłuśnia. Nijakich takich «novaŭviadzieńniaŭ jeŭrapiejskaj adukacyi» niama. Jość kanflikt nastaŭnika i škoły, jakaja paprasiła nazyvać školnika tak, jak jon chacieŭ, a nastaŭnik, kirujučysia svaimi pryncypami, admoviŭsia.
Kamientary