Dačce Biła Hiejtsa moža pahražać da 20 hadoŭ turmy z-za machlarstva z kuki-fajłami
Małodšaja dačka zasnavalnika Microsoft apynułasia ŭ centry hučnaha rasśledavańnia. Jaje startap padazrajuć u niezakonnaj padmienie fajłaŭ cookie dla atrymańnia kamisijnych vypłat, što pa zakonach ZŠA kvalifikujecca jak internet-machlarstva.
Jak paviedamlaje vydańnie BILD sa spasyłkaj na Bloomberg, 23‑hadovaja Fibi Hiejts i jaje startap Phia sutyknulisia z surjoznymi abvinavačvańniami. Phia — heta braŭziernaje pašyreńnie, raspracavanaje dla aŭtamatyčnaha pošuku i prymianieńnia kuponaŭ i skidak padčas anłajn-pakupak. Prajekt pačynaŭsia vielmi paśpiachova: jon sabraŭ bolš za 40 miljonaŭ dołaraŭ inviestycyj ad fondaŭ i takich znakamitaściaŭ, jak Perys Chiłtan, Džesika Alba, Chejli Bibier, Chłoi Kardašjan i Sidni Suini.
Adnak rasśledavańnie Bloomberg vyjaviła, što ciaham niekalkich miesiacaŭ kampanija nibyta zajmałasia tak zvanym «kuki-stafinham» (cookie stuffing). Hetaja machlarskaja schiema praduhledžvaje aŭtamatyčnaje ŭkaranieńnie abo padmienu fajłaŭ cookie ŭ braŭziery karystalnika bieź jaho viedama.
Cookie — nievialikija tekstavyja danyja, jakija sajty zachoŭvajuć na vašym kampjutary ci smartfonie, kab pamiatać vašy łahiny, tavary ŭ košyku abo toje, pa jakoj rekłamnaj spasyłcy vy pierajšli.
Heta dazvalaje stvaralnikam pašyreńnia atrymlivać kamisijnyja pracenty ad internet-kram za pakupki karystalnika, navat kali sama prahrama nijak nie dapamahła ździejśnić hetuju tranzakcyju.
Pa słovach amierykanskaha prakurora Aryela Hiŭniera, takaja praktyka ŭ ZŠA rasceńvajecca jak internet-machlarstva. Kali vina budzie dakazanaja, arhanizataram schiemy pahražajuć bujnyja finansavyja štrafy i tearetyčnaje turemnaje źniavoleńnie terminam da 20 hadoŭ. Varta adznačyć, što na dadzieny momant aficyjnych kryminalnych abvinavačvańniaŭ suprać Fibi Hiejts i jaje partnioraŭ nie vyłučana.
Pry hetym insajdary Bloomberg śćviardžajuć, što zasnavalniki startapa viedali pra sumnieŭnyja mietady pracy jašče ŭ kancy 2025 hoda. U rasparadžeńni vydańnia nibyta jość słužbovaja zapiska ad śniežnia 2025 hoda, u jakoj Fibi Hiejts naŭprost pytajecca, ci ŭklučana aŭtamatyčnaje raźmiaščeńnie fajłaŭ cookie na ŭsich dastupnych veb-sajtach dziela maksimizacyi kamisijnaha prybytku.
Pradstaŭniki Phia abvinavačvańni ŭ naŭmysnym machlarstvie admaŭlajuć. U kampanii padkreślili, što ŭsie «prablemnyja» funkcyi byli vydalenyja z pašyreńnia jašče 7 lipienia biahučaha hoda.
Brendavaja sumačka za $4 tysiačy i bryljanty. Vice-mis Biełarusi Alija Karotkaja schadziła ź siabroŭkaj pajeści dranikaŭ7
Brendavaja sumačka za $4 tysiačy i bryljanty. Vice-mis Biełarusi Alija Karotkaja schadziła ź siabroŭkaj pajeści dranikaŭ
Na Afonie adšukali try nieviadomyja raniej asobniki Astrožskaj Biblii. Dla jaje stvareńnia drukar Ivan Fiodaraŭ, vychadziec ź Biełarusi, vykarystoŭvaŭ teksty Skaryny66
Kamientary