Дачцэ Біла Гейтса можа пагражаць да 20 гадоў турмы з-за махлярства з кукі-файламі
Малодшая дачка заснавальніка Microsoft апынулася ў цэнтры гучнага расследавання. Яе стартап падазраюць у незаконнай падмене файлаў cookie для атрымання камісійных выплат, што па законах ЗША кваліфікуецца як інтэрнэт-махлярства.
Як паведамляе выданне BILD са спасылкай на Bloomberg, 23‑гадовая Фібі Гейтс і яе стартап Phia сутыкнуліся з сур'ёзнымі абвінавачваннямі. Phia — гэта браўзернае пашырэнне, распрацаванае для аўтаматычнага пошуку і прымянення купонаў і скідак падчас анлайн-пакупак. Праект пачынаўся вельмі паспяхова: ён сабраў больш за 40 мільёнаў долараў інвестыцый ад фондаў і такіх знакамітасцяў, як Пэрыс Хілтан, Джэсіка Альба, Хэйлі Бібер, Хлоі Кардаш'ян і Сідні Суіні.
Аднак расследаванне Bloomberg выявіла, што цягам некалькіх месяцаў кампанія нібыта займалася так званым «кукі-стафінгам» (cookie stuffing). Гэтая махлярская схема прадугледжвае аўтаматычнае ўкараненне або падмену файлаў cookie ў браўзеры карыстальніка без яго ведама.
Cookie — невялікія тэкставыя даныя, якія сайты захоўваюць на вашым камп'ютары ці смартфоне, каб памятаць вашы лагіны, тавары ў кошыку або тое, па якой рэкламнай спасылцы вы перайшлі.
Гэта дазваляе стваральнікам пашырэння атрымліваць камісійныя працэнты ад інтэрнэт-крам за пакупкі карыстальніка, нават калі сама праграма ніяк не дапамагла здзейсніць гэтую транзакцыю.
Па словах амерыканскага пракурора Арыэля Гіўнера, такая практыка ў ЗША расцэньваецца як інтэрнэт-махлярства. Калі віна будзе даказаная, арганізатарам схемы пагражаюць буйныя фінансавыя штрафы і тэарэтычнае турэмнае зняволенне тэрмінам да 20 гадоў. Варта адзначыць, што на дадзены момант афіцыйных крымінальных абвінавачванняў супраць Фібі Гейтс і яе партнёраў не вылучана.
Пры гэтым інсайдары Bloomberg сцвярджаюць, што заснавальнікі стартапа ведалі пра сумнеўныя метады працы яшчэ ў канцы 2025 года. У распараджэнні выдання нібыта ёсць службовая запіска ад снежня 2025 года, у якой Фібі Гейтс наўпрост пытаецца, ці ўключана аўтаматычнае размяшчэнне файлаў cookie на ўсіх даступных вэб-сайтах дзеля максімізацыі камісійнага прыбытку.
Прадстаўнікі Phia абвінавачванні ў наўмысным махлярстве адмаўляюць. У кампаніі падкрэслілі, што ўсе «праблемныя» функцыі былі выдаленыя з пашырэння яшчэ 7 ліпеня бягучага года.
Чым цяпер займаюцца дзяўчаты, якіх летась назвалі самымі прыгожымі ў Беларусі?9
Чым цяпер займаюцца дзяўчаты, якіх летась назвалі самымі прыгожымі ў Беларусі?
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара2121
Каментары