Украіна мяняе мэты ў вайне: Кулеба кажа пра вызваленне ўсіх тэрыторый
Міністр замежных справаў Украіны Зміцер Кулеба заявіў, што Украіна ў выпадку перамогі ў бітве за Данбас хацела б вызваліць усе свае тэрыторыі, акупаваныя Расіяй, аднак перамовы таксама не выключыў. Пра гэта Дзмітрый Кулеба заявіў у інтэрвʼю «Financial Times», піша «Украінская праўда».
«У першыя месяцы вайны перамога для нас выглядала як адвод расійскіх войскаў на пазіцыі, якія яны займалі да 24 лютага, і адплата за нанесеную шкоду. Цяпер, калі мы будзем дастаткова моцныя на ваенным фронце і выйграем бітву за Данбас, што будзе вырашальным для далейшай дынамікі вайны, то, безумоўна, перамога для нас у гэтай вайне будзе вызваленнем астатніх нашых тэрыторый», — сказаў ён.
Паводле Кулебы, толькі паражэнне Расіі дазволіць Украіне зноў адкрыць свае чарнаморскія парты і аднавіць экспартную эканоміку.
Калі Кіеў атрымае «яшчэ больш ваеннай падтрымкі, мы зможам адкінуць іх з Херсонскай вобласці, разграміць Чарнаморскі флот і разблакаваць праход [да мора]».
Але ён таксама прызнаў, што кровапраліцце можа быць занадта вялікім, і Украіне, магчыма, давядзецца весці перамовы.
У такім выпадку Кіеў хацеў бы «падысці да непазбежнага моманту з наймацнейшымі картамі», сказаў кіраўнік МЗС.
5 красавіка прэзідэнт Украіны Уладзімір Зяленскі казаў, што перамогай для Украіны будзе адступленне Расіі да пазіцый, якія яна займала да 24 лютага гэтага года.
Украінскія ўлады заклікалі Захад даць зброю для абароны дзяржавы, і ў апошнія тыдні заходнія партнёры актыўна пастаўляюць узбраенні ва Украіну.
9 траўня прэзідэнт ЗША Джо Байдэн падпісаў закон аб ленд-лізе, які спросціць пастаўкі зброі ва Украіну і Еўропу.
Цяпер чытаюць
Ціханоўская пра мужа: Увесь ягоны свет перакулены17
Каментары