«Мяне заўсёды ратавала вера…» Выйшла кніга ўспамінаў пра кардынала Свёнтка
У выдавецтве «Pro Christo» выйшла ў свет кніга ўспамінаў пра незвычайную асобу першага ў гісторыі каталіцкага касцёла сучаснай Беларусі — кардынала Казіміра Свёнтка «Мяне заўсёды ратавала вера…»
Гэта кніга-сведчанне тых, хто добра ведаў кардынала, хто з ім працаваў, хто меў шчасце з ім кантактаваць і быць сведкам яго жывой непахіснай веры, яго адданасці Хрысту і касцёлу, паведамляе catholic.by.
Уступнае слова да выдання напісаў арцыбіскуп эмерыт Тадэвуш Кандрусевіч.
Заслужаны беларускі іерарх, які ў 1991 годзе ўдзяліў будучаму кардыналу біскупскае пасвячэнне, а ў 2007 годзе стаў яго наступнікам на Мінска-Магілёўскай кафедры, ва ўступным слове піша пра Казіміра Свёнтка:
«Яго імя як жывога мучаніка часоў атэістычных ганенняў на веру, першага Мінска-Магілёўскага Мітрапаліта, Апостальскага Адміністратара Пінскай дыяцэзіі, а таксама першага і шматгадовага Старшыні Канферэнцыі Каталіцкіх Біскупаў у Беларусі залатымі літарамі ўпісанае ў сучасную гісторыю адраджэння каталіцкага касцёла на Беларусі.<…>
Сваім ахвярным служэннем цягам 20-і гадоў кардынал Казімір Свёнтак пакінуў важкі след у гісторыі каталіцкага касцёла на Беларусі.
Найважнейшымі вехамі яго служэння неабходна лічыць аднаўленне мінскай архікафедры Імя Найсвяцейшай Панны Марыі і дзейнасці Міждыяцэзіяльнай вышэйшай духоўнай семінарыі імя святога Тамаша Аквінскага ў Пінску, у якой ён сам атрымаў святарскую фармацыю, правядзенне Сіноду Мінска-Магілёўскай архідыяцэзіі, Пінскай і Віцебскай дыяцэзій, заснаванне неабходных для дзейнасці касцёла структур, у тым ліку такіх важных як выдавецтва і СМІ, падрыхтоўку і выданне літургічнай і катэхетычнай літаратуры, арганізацыю дабрачыннай дзейнасці і шмат чаго іншага.
Сустракаючыся і працуючы разам з кардыналам Казімірам Свёнткам, я перадусім быў уражаны клопатам Яго Эмінэнцыі пра касцёл і яго будучыню. Касцёл яму быў Маці, якая яго нарадзіла для духоўнага жыцця, і якой ён ахвярна служыў да канца сваіх дзён.
У кардынале Свёнтку ўражвала таксама і тое, што ён ніколі не наракаў на цяжкасці, нават на тыя, што спазнаў у вязніцы, будучы асуджаным на вышэйшую меру пакарання — расстрэл.
У самых складаных сітуацыях ён давяраў Божаму Провіду, а не «моцным» гэтага свету. Па жыцці яго вяла глыбокая вера ў Бога і апека Найсвяцейшай Панны Марыі»,— адзначае арцыбіскуп Кандрусевіч.
Прэзентацыя новага выдання адбылася з удзелам арцыбіскупа Кандрусевіча 22 кастрычніка ў кафедральным касцёле Найсвяцейшага Імя Марыі ў Мінску пасля святой Імшы ў гадавіну рэкансекрацыі галоўнай святыні Мінска-Магілёўскай архідыяцэзіі.
Цяпер чытаюць
Бабарыка тры хвіліны адказваў на пытанне, чый Крым. Так і не адказаў86
Каментары