Збітага Рамана Бандарэнку з «плошчы Перамен» хуткая забрала з міліцыі непрытомным
31-гадовы жыхар Мінска Раман Бандарэнка быў учора ўвечары затрыманы сілавікамі на т.зв. «плошчы Перамен» — квартале між мінскімі вуліцамі Чарвякова і Сморгаўскі тракт. Праз кароткі час у Цэнтральнае РУУС была выклікана хуткая дапамога. Яна забрала мужчыну непрытомным.
Дактары з Бальніцы хуткай дапамогі перадалі ў СМІ дыягназ Рамана Бандарэнкі: цяжкая закрытая ЧМТ, вострыя субдуральныя гематомы на галаве, кровазліццё ў мозг, траўмы мяккіх тканак.
Стан хлопца цяжкі. Ён у коме. Па шкале комы Глазга ў яго — 4Б.
Чытайце таксама: «Ён між жыццём і смерцю»: медык расшыфраваў скарот «ШКГ 4б» з выпіскі збітага Бандарэнкі
Раман Бандарэнка жыў на вуліцы Чарвякова ў Мінску, не на самой «Плошчы Перамен», але побач з ёй.
«Плошчай Перамен» называюць свой квартал жыхары аднаго з мінскіх мікрараёнаў. Такая назва прыжылася пасля таго, як жыхары гэтага жылога комплексу намалявалі на адной са сцен мурал з дыджэямі перамен. Лукашэнкаўцы замалёўвалі гэты мурал 14 разоў, але жыхары яго аднаўлялі. У гэтым квартале склалася моцная супольнасць. Жыхары запрашаюць музыкаў на вечаровыя канцэрты, самаадукоўваюцца на лекцыях і ўпрыгожваюць прастору нацыянальнай сімволікай.
11 лістапада Бандарэнка пабачыў у чаце, што ціхары чарговы раз зрываюць бел-чырвона-белыя стужкі, і вырашыў не заставацца дома.
«Прыехалі ў цывільным шэсць мужчын і тры жанчыны. Жыхары шматпавярховак тут жа напісалі пра гэта ў мясцовым чаце. Сярод тых, хто вырашыў выйсці на вуліцу, быў 31-гадовы Раман Бандарэнка, ён паспеў напісаць: «Я выходжу!» Паміж чалавекам у балаклаве і невядомым хлопцам завязалася нейкая спрэчка, Рома ў ёй не ўдзельнічаў, ён стаяў побач і слухаў, — кажа сведка падзей. — Потым ён нешта сказаў, і чалавек у балаклаве спытаў: «Ты чаго борзы такі?» Адштурхнуў Рому, той спрабаваў ухіліцца, але невядомы схапіў яго і з усёй сілы адкінуў да горкі на пляцоўцы. Ён моцна стукнуўся галавой», — расказалі мясцовыя жыхары парталу Tut.by.
«Наша Ніва» пагаварыла са стрыечнай сястрой Рамана.
«Сведкі сказалі яго маме, што Рамана закінулі ў бус, пасля бус вельмі моцна трэсла — магчыма, яго білі? — кажа сястра. — Потым яго адвезлі ў РУУС. Рома быў у запаволеным стане, яго пачало ванітаваць. Але чамусьці ў РУУСе ён правёў ажно 2 гадзіны, — расказвае сястра. — Пасля ён трапіў у бальніцу, дзе зрабілі аперацыю.
Сёння ў бальніцы кансіліум, прыехаў нейкі прафесар. Кажуць, каб раней прывезлі ў бальніцу, то былі б нейкія шанцы, а цяпер шанцаў мала зусім. Дактары кажуць, што яго вельмі позна даставілі. Цяпер Раман у коме».
Вось дакумент, перададзены дактарамі:
Сястра кажа, што Раман быў асцярожным чалавекам, на Маршы не выходзіў: «Мне казаў, што ведае, што могуць з ім зрабіць, калі затрымаюць, бо ён служыў у спецназе — часці 3214 Унутраных войскаў».
Раман адслужыў у спецназе ўжо пасля Акадэміі мастацтваў.
Працаваў апошнім часам дырэктарам адной з крамаў «Востраў чысціні». Ён прыйшоў туды ўвогуле адміністратарам, паступова дарос да дырэктара, распавяла яго сястра.
Міліцыя адрэагавала на сітуацыю словамі «канфрантацыя поглядаў». Паводле праваахоўнікаў, у двары «біліся невядомыя». Па гэтым факце, маўляў, праводзіцца, праверка.
«МУС канстатуе: некаторыя грамадзяне з мэтай данясення да асяроддзя свайго асабістага меркавання з нагоды сваёй палітычнай пазіцыі вывешваюць, малююць, наляпляюць недзяржаўную сімволіку на фасадах будынкаў, гарадскіх канструкцыях, асабістыя аўтамабілі. Іншыя неабыякавыя грамадзяне аднаўляюць парадак і не дапускаюць парушэння правілаў добраўпарадкавання. З наступствамі падобных канфліктаў, часам вельмі сумнымі, разбіраецца МУС», — гаворыцца ў афіцыйным паведамленні.
Чытайце таксама: «На пляцоўцы была валтузня, а не бойка». Відавочца нападу на Рамана Бандарэнку расказала падрабязнасці інцыдэнту
Між тым журналісты і жыхары Мінска не раз фіксавалі, як здымаюць сцягі і стужкі, замалёўваюць муралы брыгады з удзелам сілавікоў у масках і балаклавах ці пад аховай сілавікоў у балаклавах са спецыяльных падраздзяленняў. Ніякай законнай асновы, каб здымаць нацыянальныя сцягі і стужкі, няма. Таму гэта абгрунтоўваюць нібыта «архітэктурнымі» і т.п. нормамі. Па факце ж знішчаецца ўсё, што нясе ў сабе сімволіку пратэсту або вальнадумства.
Цяпер чытаюць
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу7
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх1919
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх19
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск1818
Каментары