Мінфін ЗША апублікаваў новае «ўдакладненьне». З падобнага «ўдакладненьня» ў сакавіку і ўспыхнула дыпляматычная вайна. Піша ў сваім блогу Аляксандар Класкоўскі.
Гарачая навіна. Мінфін ЗША апублікаваў новае ўдакладненьне што да прымяненьня эканамічных санкцый датычна Беларусі.
Як мы пераканаліся ўжо, руціннае слова "ўдакладненьне" можа быць падманлівым. У сакавіку менавіта пасьля падобнай публікацыі на сайце амэрыканскага фінансавага ведамства між Менскам ды Вашынгтонам акурат і разгарэлася дыпляматычная вайна, што доўжыцца і па сёньня. Зараз Мінфін ЗША канкрэтызаваў санкцыі, улучыўшы ў "чорны сьпіс" тры прадпрыемствы, што ўваходзяць у структуру "Белнафтахіму": лідзкую "Лякафарбу", полацкае "Шкловалакно" і "Беларускі нафтавы гандлёвы дом".
Хоць дасюль беларускія афіцыйныя асобы, камэнтуючы тыя санкцыі, пазьбягалі лічбавай канкрэтыкі і стараліся давесьці, што гэта нам як слану шраціна, асобныя эмацыйныя пасажы наводзяць на думку, што ЗША намацалі ўсё ж адчувальную кропку.
Экспэрты-эканамісты яшчэ мусяць вызначыць, чым ёсьць сёньняшняе "ўдакладненьне" — сымбалічным жэстам або новым сур'ёзным ударам. Здаецца, адмыслоўцы схіляюцца да першага варыянту. У любым выпадку гэты крок ЗША ёсьць сьведчаньнем таго, што ўлагоджваньнем сытуацыі і ня пахне.
Па гарачых сьлядох эканаміст Яраслаў Раманчук сказаў мне так: "Наўрад ці гэта надта адаб'ецца на кароткатэрміновых бізнэсовых плянах прадпрыемстваў, што фігуруюць у новым удакладненьні, але гэта немінуча адаб'ецца на настроях патэнцыйных інвэстараў, цыркуляцыі беларускіх фінансавых плыняў за мяжой".
Дарэчы, акурат напярэдадні і кіраўнік Нацбанку Пётра Пракаповіч у інтэрвію "Рэйтэр" мусіў прызнаць, што амэрыканскія санкцыі "палохаюць патэнцыйных інвэстараў", наносяць урон інвэстыцыйнаму іміджу Беларусі.
Зрэшты, рэч ня толькі ў іміджы. Вось вам яшчэ адна фраза Пракаповіча: "Але сьвятое месца пустым не бывае. Ня прыдуць інвэстары з Захаду — прыдуць інвэстары з Усходу".
Вось толькі гэтага і неставала — каб тыя, каго нашае начальства падчас газавай вайны ў гневе называла "тлустымі катамі", зараз, карыстаючыся сытуацыяй, скупілі сінявокую рэспубліку па дзяшоўцы!
Праўда, Яраслаў Раманчук лічыць, што інвэстары з усходу таксама ня надта кінуцца сюды, пакуль няма празрыстых правілаў гульні.
Ва ўсякім разе, відавочна, што Вашынгтон (які адкрытым тэкстам казаў: ня вызваліце палітвязьняў — чакайце працягу!) ідзе на прынцып. На думку палітоляга Андрэя Фёдарава, Амэрыка не прывыкла адступаць пры такіх калізіях, як зараз у стасунках з беларускім рэжымам, і заўжды імкнецца на практыцы давесьці адданасьць тым прынцыпам, што дэкляруе. Ён не выключае, што на рашэньне Штатаў мог паўплываць і жорсткі тон нядаўняга інтэрвію Лукашэнкі той самай агенцыі "Рэйтэр": маўляў, пытаньне з палітвязьнямі закрытае, і кропка!
«Набірала ваду з унітазнага бачка для гатавання, мыцця». Ганна Бонд шчыра распавяла пра цяжкае дзяцінства13
Каментары