Minfin ZŠA apublikavaŭ novaje «ŭdakładnieńnie». Z padobnaha «ŭdakładnieńnia» ŭ sakaviku i ŭspychnuła dyplamatyčnaja vajna. Piša ŭ svaim błohu Alaksandar Kłaskoŭski.
Haračaja navina. Minfin ZŠA apublikavaŭ novaje ŭdakładnieńnie što da prymianieńnia ekanamičnych sankcyj datyčna Biełarusi.
Jak my pierakanalisia ŭžo, rucinnaje słova "ŭdakładnieńnie" moža być padmanlivym. U sakaviku mienavita paśla padobnaj publikacyi na sajcie amerykanskaha finansavaha viedamstva miž Mienskam dy Vašynhtonam akurat i razharełasia dyplamatyčnaja vajna, što doŭžycca i pa siońnia. Zaraz Minfin ZŠA kankretyzavaŭ sankcyi, ułučyŭšy ŭ "čorny śpis" try pradpryjemstvy, što ŭvachodziać u strukturu "Biełnaftachimu": lidzkuju "Lakafarbu", połackaje "Škłovałakno" i "Biełaruski naftavy handlovy dom".
Choć dasiul biełaruskija aficyjnyja asoby, kamentujučy tyja sankcyi, paźbiahali ličbavaj kankretyki i staralisia davieści, što heta nam jak słanu šracina, asobnyja emacyjnyja pasažy navodziać na dumku, što ZŠA namacali ŭsio ž adčuvalnuju kropku.
Eksperty-ekanamisty jašče musiać vyznačyć, čym jość siońniašniaje "ŭdakładnieńnie" — symbaličnym žestam abo novym surjoznym udaram. Zdajecca, admysłoŭcy schilajucca da pieršaha varyjantu. U lubym vypadku hety krok ZŠA jość śviedčańniem taho, što ŭłahodžvańniem sytuacyi i nia pachnie.
Pa haračych śladoch ekanamist Jarasłaŭ Ramančuk skazaŭ mnie tak: "Naŭrad ci heta nadta adabjecca na karotkaterminovych biznesovych planach pradpryjemstvaŭ, što fihurujuć u novym udakładnieńni, ale heta nieminuča adabjecca na nastrojach patencyjnych investaraŭ, cyrkulacyi biełaruskich finansavych płyniaŭ za miažoj".
Darečy, akurat napiaredadni i kiraŭnik Nacbanku Piotra Prakapovič u interviju "Rejter" musiŭ pryznać, što amerykanskija sankcyi "pałochajuć patencyjnych investaraŭ", nanosiać uron investycyjnamu imidžu Biełarusi.
Zrešty, reč nia tolki ŭ imidžy. Voś vam jašče adna fraza Prakapoviča: "Ale śviatoje miesca pustym nie byvaje. Nia pryduć investary z Zachadu — pryduć investary z Uschodu".
Voś tolki hetaha i niestavała — kab tyja, kaho našaje načalstva padčas hazavaj vajny ŭ hnievie nazyvała "tłustymi katami", zaraz, karystajučysia sytuacyjaj, skupili siniavokuju respubliku pa dziašoŭcy!
Praŭda, Jarasłaŭ Ramančuk ličyć, što investary z uschodu taksama nia nadta kinucca siudy, pakul niama prazrystych praviłaŭ hulni.
Va ŭsiakim razie, vidavočna, što Vašynhton (jaki adkrytym tekstam kazaŭ: nia vyzvalicie palitviaźniaŭ — čakajcie praciahu!) idzie na pryncyp. Na dumku palitolaha Andreja Fiodarava, Ameryka nie pryvykła adstupać pry takich kalizijach, jak zaraz u stasunkach ź biełaruskim režymam, i zaŭždy imkniecca na praktycy davieści addanaść tym pryncypam, što deklaruje. Jon nie vyklučaje, što na rašeńnie Štataŭ moh paŭpłyvać i žorstki ton niadaŭniaha interviju Łukašenki toj samaj ahiencyi "Rejter": maŭlaŭ, pytańnie z palitviaźniami zakrytaje, i kropka!
Ciapier čytajuć
«Niekatorym ludziam varta źniać ružovyja akulary». Lavončyk — pra Mielnikavu, uciečku ŭ «Bajchełp», biełyja palito i hrošy na 1300 palitviaźniaŭ2
Kamientary