Украіна прапанавала ЗША здзелку па пастаўках зброі на $100 мільярдаў і адмовілася ад тэрытарыяльных саступак Расіі
Украіна прапанавала ЗША закупіць амерыканскую зброю на $100 млрд, якую прафінансуе Еўропа. Гэта стане часткай гарантый бяспекі пасля мірнага ўрэгулявання з Расіяй. Аб гэтым паведамляе Financial Times са спасылкаю на дакументы, у якіх выкладзены прапановы Кіева прэзідэнту ЗША на сустрэчы ў Белым доме.
Паводле дакумента, з якім азнаёмілася Financial Times, Украіна паабяцала ЗША закупіць амерыканскую зброю на $100 млрд з фінансавай дапамогай Еўропы ў рамках здзелкі па атрыманні гарантый бяспекі ЗША.
Акрамя таго, Кіеў і Вашынгтон заключаць здзелку на $50 млрд па вытворчасці беспілотнікаў украінскімі кампаніямі.
У дакуменце не ўказана, якую менавіта зброю Украіна просіць закупіць у рамках здзелкі, але Кіеў ясна даў зразумець, што хоча набыць як мінімум 10 сістэм супрацьпаветранай абароны Patriot амерыканскай вытворчасці для абароны сваіх гарадоў і крытычна важнай інфраструктуры, а таксама іншыя ракеты і абсталяванне.
Кіеў не прыме ніякіх пагадненняў, што прадугледжваюць тэрытарыяльныя саступкі на карысць Расіі, і настойвае на спыненні агню ў якасці першага кроку да поўнага мірнага пагаднення, гаворыцца ў дакуменце, складзеным уладамі Украіны.
Згодна з дакументам, Кіеў таксама адхіляе прапанову Пуціна, зробленую Трампу на Алясцы, аб замарозцы астатняй лініі фронту, калі Украіна выведзе войскі з усходніх рэгіёнаў — Данецкай і Луганскай абласцей.
Гэта створыць «плацдарм для далейшага і хуткага прасоўвання расійскіх войск у напрамку Дняпра» і дазволіць Пуціну «дасягнуць мэтаў агрэсіі іншымі сродкамі», гаворыцца ў дакуменце.
Згодна з дакументам, Украіна лічыць, што спроба Расіі вырашыць тэрытарыяльныя пытанні да пачатку далейшых перамоў аб доўгатэрміновым мірным пагадненні прывядзе да таго, што сітуацыя на месцах будзе развівацца па прынцыпе «завершанага факту», пры гэтым нічога не будзе зроблена для забеспячэння будучай бяспекі Кіева.
Кіеў таксама настойвае на прадастаўленні яму поўнай кампенсацыі ад Расіі за шкоду падчас вайны, якая патэнцыйна можа быць аплачаная за кошт расійскіх актываў на суму 300 мільярдаў долараў, замарожаных у заходніх краінах. Любое паслабленне санкцый павінна быць прадастаўлена толькі ў тым выпадку, калі Расія выконвае будучае мірнае пагадненне і «паводзіць сябе сумленна», дадаецца ў дакуменце.
Цяпер чытаюць
Што вядома пра затрыманых радыёаматараў, якім пагражае аж да расстрэлу11
Каментары
Усё меньшае гэта "капітуляцыя"