Алесь Кіркевіч і Алесь Дзянісаў з Гродна аштрафаваныя за «незаконны выраб прадукцыі СМІ»
Алесь Дзянісаў (злева) і Алесь Кіркевіч.
Два гродзенскія журналісты-фрылансеры — Алесь Кіркевіч і Алесь Дзянісаў — прызнаныя вінаватымі ў незаконным вырабе прадукцыі сродкаў масавай інфармацыі, а менавіта падрыхтоўцы матэрыялу для замежнага СМІ без акрэдытацыі.
Такое рашэнне прыняў 19 жніўня суд Ленінскага раёна Гродна, паведамляе Беларуская асацыяцыя журналістаў (БАЖ).
Паводле рашэння суддзі Юрыя Казакевіча кожны з журналістаў павінен заплаціць штраф у памеры 25 базавых велічынь (4,5 млн. рублёў).
У БАЖ нагадваюць, што нагодай для распачынання адміністрацыйнай справы ў дачыненні да Кіркевіча і Дзянісава стаў іх сюжэт для тэлеканала «Белсат» ад 24 чэрвеня, у якім расказвалася пра выставу лялек літоўскіх майстроў у Гродне.
Разгляд справы пачаўся 23 ліпеня, аднак яе матэрыялы былі накіраваныя на дапрацоўку. 14 жніўня разгляд працягваўся без прысутнасці аўтараў тэлесюжэта.
«У гэтай сітуацыі самае складанае для мяне — тое, што ўлада «перакрывае кісларод», — цытуе Дзянісава прэс-служба БАЖ. — Цяпер я ўжо не магу здымаць у гісторыка-археалагічным музеі, я не магу здымаць у музеі рэлігіі, я не магу здымаць у лялечным тэатры. Цяпер дадалася і выставачная зала на вуліцы Ажэшкі».
Санкцыя артыкула 22.9 Кодэкса аб адміністрацыйных правапарушэннях «Незаконны выраб і распаўсюджванне прадукцыі сродкаў масавай інфармацыі» прадугледжвае штраф у памеры ад 20 да 50 базавых велічынь.
Як паведаміў 18 жніўня старшыня БАЖ Андрэй Бастунец, з пачатку 2015 года арганізацыя зафіксавала 29 выпадкаў вынясення штрафаў журналістам-фрылансерам у Беларусі. Такім чынам, іх колькасць павялічылася да 30. Агульная сума штрафаў згодна з артыкулам 22.9 КоАП, паводле падлікаў БАЖ, з пачатку года перавысіла 146 млн. рублёў.
Нагадаем, 4 жніўня падчас інтэрв'ю «Радыё Свабода», «Еўрарадыё» і парталу tut.by Аляксандр Лукашэнка заявіў, што разгледзіць праблему, звязаную з дзейнасцю журналістаў, якія не супрацоўнічаюць з беларускімі і замежнымі СМІ на аснове афіцыйных рабочых дагавораў.
Лукашэнка адзначыў, што штрафаваць журналістаў — «гэта дурасць», бо «ўсё адно напішуць неяк дзесьці пра праблемы».
«Забараняць — гэта не мой прынцып. Я вывучу гэтую праблему. Што да гэтых штрафаў — таксама вывучым, людзі ж не багатыя, я разумею. Я вам абяцаю, што я разгляджу гэтае пытанне, таму што, мабыць, вы маеце рацыю тут», — сказаў прэзідэнт, звяртаючыся да журналіста «Радыё Свабода» Валерыя Каліноўскага.
Цяпер чытаюць
Былы беларускі міліцыянер шукае «пародзістую прыгажуню». Называе сябе мільянерам, а сам судзіцца з былой жонкай за аліменты21
Каментары