У Вялікім тэатры оперы і балета Беларусі ў Мінску 1 і 2 лістапада адбудуцца прэм`ерныя паказы балета «Лаўрэнсія» Аляксандра Крэйна.
Вахтанг Чабукіяні ўпершыню паставіў гэты балет у 1939 годзе паводле п`есы Лопе дэ Вега «Авечая крыніца». Спектакль з вялікім поспехам ішоў у Ленінградскім дзяржаўным акадэмічным тэатры оперы і балета імя С. М.Кірава (цяпер — Марыінскі тэатр) да сярэдзіны 1970-х гадоў і ў маскоўскім Вялікім тэатры да першай паловы 1960-х, у Тбіліскім тэатры да 1980-х, потым быў забыты і толькі ў 2007 годзе адноўлены ў Тбілісі.
У мінскім тэатры оперы і балета ў 1955—1956 гадах адбылося ўсяго 12 паказаў спектакля «Лаўрэнсія», пастаўленага дырыжорам Іосіфам Абрамісам, балетмайстрам Сямёнам Дрэчыным, мастаком Міхаілам Блішчам, а затым гэты балет сышоў з рэпертуару і больш не аднаўляўся. Амаль праз 60 гадоў «Лаўрэнсія» вяртаецца на беларускую сцэну. Народная артыстка Грузіі і Расіі Ніна Ананіяшвілі падрыхтавала новую рэдакцыю славутага балета, яна з`яўляецца балетмайстрам-пастаноўшчыкам гэтага спектакля.
На прэс-канферэнцыі напярэдадні прэм`еры Ніна Ананіяшвілі расказала: «Я шчаслівая, што ў мяне ёсць магчымасць аднавіць і вярнуць свету вялікую харэаграфію Вахтанга Чабукіяні. Вельмі прыемна, што мы — інтэрнацыянальная каманда: грузіны, рускія, беларусы, эстонец, — аб`ядналіся, каб паказаць сваё мастацтва гледачам. Працаваць з маёй камандай і з беларускай трупай было вельмі прыемна, усе сілы тэатра сканцэнтраваліся, каб стварыць гэты спектакль на вельмі высокім узроўні».
У спектаклі занятыя вядучыя салісты і артысты беларускага балета.
-
У Гомельскім драматычным тэатры — кадравыя чысткі. Зноў праз «палітыку»
-
«Будзе смешна і балюча»: «Купалаўцы» прэзентуюць заўтра новы спектакль. У галоўных ролях — Манаеў, Белахвосцік, Гарцуева
-
«Рашэнне прыйшло звонку». Што адбываецца ў віцебскім тэатры, дзе ў спектаклі прагучала «Жыве Фландрыя!» і пачалася чарада звальненняў?
Галоўны ідэолаг Беларусі знайшоў у краіне «псеўдапатрыятычныя ячэйкі» і заклікаў да змагання з імі «адзіным баявым кулаком»23
Каментары