"Jak rozumy"

Jak rozumy (Like Minds)

Aŭstralija – Vialikabrytanija, 2006, kalarovy, 110 chv.

Režyser: Hrehary Dž.Ryd

Roli vykonvajuć: Toni Kolet, Edzi Redmejn, Tom Starydž, Ketryn Bredšoŭ, Krejh Krośbi, Kiejt Mebierli, Patryk Mełahajd, Łajam Makiena

Žanr: Psycholaha-mistyčny trymcieńnik

Adznaka: 5,5 (z 10)

Psycholah-kryminalist Sali Roŭ dapytvaje 17-hadovaha Aleksa, jakoha abvinavačvajuć u zabojstvie siabra Najdžeła. Ad Sali patrabujuć, kab jana znajšła dokazy, jakija dazvolili b pasadzić junaka ŭ turmu, ale žančyna sumniajecca ŭ vinavataści chłopca. Niečakana hierainia vychodzić na patajemnuju arhanizacyju – a Aleks sprabuje davieści joj, što byŭ źviazany z zabitym mistyčnymi poviaziami.

Aŭstralijskaja karcina “Jak rozumy” – sučasnaja varyjacyja na temu Edhara Po, tamplijeraŭ i padletkavaj psychalohii.

Ciomnavoki Najdžeł sa źmiarćviełym tvaram, jaki zachaplajecca anatomijaj i lubić mumifikavać žyviołaŭ – dvajnik Aleksa. Jon pałochaje hieroja svaimi vivisektarskimi zvyčkami, i, što najhorš – zdolny čytać samyja zmročnyja dumki chłopca.

Ścień, dvajnik, spakušalnik – naviejanyja klasyčnaj navelaj “Ŭiljam Ŭiłsan”.

Akramia hetaha jość jašče tajny orden, da jakoha naležać baćki hierojaŭ… orden tamplijeraŭ. Ale tamplijery nie vyhladajuć u karcinie naviaźlivaju papsoj – heta častka hatyčnaje atmasfery, jakuju lubiŭ uzhadoŭvać amerykanski majstar kašmaraŭ.

U adroźnieńni ad maładziova-žachaŭskich spekulacyj na Edhary Po, aŭstralijskaja stužka kranaje metafizyčnaj surjoznaściu i pradumana-“ramantyčnaju” kulturaju kadru: zmročnyja kalidory, źbialełyja tvary vučniaŭ, smurodna-žoŭtaja medyčnaja vadkaść – incest i nekrafilija ŭ tradycyjach Edhara Po (hniusnyja złačynstvy za kadram, ale my zdahadvajemsia, što adbyłosia).

Jak i rodapačynalnik detektyvu Hrehary Ryd vykarystoŭvaje zamahilnuju temu, kab daśledavać hłybini dušy: nianaviść, zajzdraść, cisk ułady, dvaistaść pačućciaŭ, hrech, daravańnie, pomsta. Psychalahičnym vyšukam spryjaje pierakanaŭčaja hulnia Edzi Redmejna (Aleksa) i Toni Kolet (Sali).

I chacia debiutny ihravy film Hrehary Ryda – pradkazalny j aściarožny – stužka čaplaje zabytaj tryvohaj i źlakanym namiokam na biezdań.

Film – z subtytrami i žyvym hołasam pierakładčycy.

Karcina demanstrujecca ŭ mienskim kinateatry “Pijaner” u prahramie “Pa-za miežami”. Seansy: 20, 22 sakavika – a 21.00, 21 i 23 sakavika – a 15.00 i 21.00, 24 i 25 sakavika – a 17.00 i 21.00.

U prahramie taksama – aryhinalnaja pradmova i dyskusija z udziełam psycholaha.

Fota z sajtu Kino.br.by

Usie filmy

• 0
• 0
• 0
• 0
• 0
• 0
• 0
• 0