Vypadak zdaryŭsia ŭ Kobrynie.
Za razbojny napad na adździaleńnie banka asudžany20-hadovy indyvidualny pradprymalnik z Kobryna, jaki raniej nie pryciahvaŭsia da kryminalnaj adkaznaści.
Jak paviedamiŭ namieśnik načalnika adździeła prakuratury Bresckaj vobłaści Hienadź Bury, 4 sakavika kobryniec pryjechaŭ u Pružany. Prykładna ŭ 11 hadzin ranicy ŭ čornaj šapačcy, soncaachoŭnych akularach, prykryŭšy tvar čornym šalikam, jon zajšoŭ u pamiaškańnie adździaleńnia adnaho z bankaŭ, dzie znachodziłasia tolki kasir. Chłopiec padyšoŭ da žančyny, i jana skazała jamu: «Vy tak padobny na rabaŭnika». Na što małady čałaviek adkazaŭ: «A ja i jość rabaŭnik». Paśla hetaha, pahražajučy kasiru pradmietam, padobnym na pistalet, zapatrabavaŭ hrošy. Jon zavałodaŭ 13.300 rasijskimi rublami, 3.128 dołarami ZŠA, 1.885 jeŭra, 50 polskimi złotymi i źbieh. 4 krasavika chłopiec byŭ zatrymany ŭ Kobrynie.
24 červienia sud Pružanskaha rajona pryznaŭ jaho vinavatym va ŭčynieńni razboju ŭ bujnym pamiery (č. 2 art. 207 KK) i pryhavaryŭ da šaści hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach uzmocnienaha režymu z kanfiskacyjaj majomaści.
Da vyniasieńnia pryhavoru svajaki maładoha čałavieka kampiensavali pryčynieny materyjalny ŭron banku ŭ poŭnym abjomie.
Jak adznačyŭ Bury, u sudzie žychar Kobryna pryznaŭ svaju vinu častkova. Jon zajaviŭ, što byŭ vinien svajmu znajomamu 2.100 dołaraŭ ZŠA, jakija jamu treba było addać da 4 sakavika. U baćkoŭ jon nie staŭ prasić hrošaj i vyrašyŭ vykraści ich u adnym z bankaŭ u Pružanach, uziaŭšy z saboj cacačny pistalet. Pavodle słoŭ asudžanaha, jon addaŭ doŭh znajomamu, astatnija hrošy spaliŭ.
6 vieraśnia sudovaja kalehija pa kryminalnych spravach Bresckaha abłasnoha suda adchiliła skarhi asudžanaha i jaho abaroncaŭ, pakinuŭšy vyniesieny rajonnym sudom pryhavor bieź źmianieńnia, i jon nabyŭ zakonnuju moc.
Kamientary