Sikorski pra mahčymy napad rasijan na Polšču: Jany niešta rychtujuć, hetak sama, jak heta było pierad uvarvańniem va Ukrainu
«My nie možam vyklučać, što, choć Pucin i nie zdolny pieramahčy, jon usio roŭna moža pryniać jašče adno padobnaje rašeńnie».
Kiraŭnik MZS zajaviŭ, što Polšča surjozna stavicca da pahroz z Maskvy, chacia nie panikuje, piša «Jeŭrapiejskaja praŭda».
«Zaniepakojenaść jość, bo Pucin napaŭ na Ukrainu, hruntujučysia na aptymistyčnych i całkam pamyłkovych acenkach. Jon vyklikaŭ vielizarnyja čałaviečyja pakuty i surjoznyja ekanamičnyja straty pa ŭsioj Jeŭropie, pryniaŭšy heta varjackaje i złačynnaje rašeńnie ab uvarvańni va Ukrainu. Tamu my nie možam vyklučać, što, choć jon i nie zdolny pieramahčy, jon usio roŭna moža pryniać jašče adno padobnaje rašeńnie», — skazaŭ Sikorski.
Ministr kamientavaŭ infarmacyju brytanskaj haziety The Telegraph pra toje, što Złučanyja Štaty nibyta pieradali Varšavie papiaredžańnie ab mahčymaj uzbrojenaj pravakacyi Rasii suprać Polščy, kab «vyprabavać rašučaść NATA».
Čynoŭnik skazaŭ, što nie moža ni paćvierdzić, ni abvierhnuć hetuju infarmacyju, ale «navina pachodzić z aŭtarytetnaha vydańnia, tamu, imavierna, jana praŭdzivaja».
Jon vykazaŭ spadziavańnie, što vykryćcio namieraŭ Rasii zmusić jaje admovicca ad hetych płanaŭ.
«Mienavita tamu my pasyłajem rasijanam sihnał:
my viedajem, što jany niešta rychtujuć, hetak sama, jak heta było pierad uvarvańniem va Ukrainu. I, zahadzia vykryvajučy ich namiery, ja spadziajusia, što nam udasca pierakanać ich admovicca ad svajoj ahresiŭnaj pazicyi», — dadaŭ čynoŭnik.
U toj ža čas Sikorski ŭpeŭnieny, što Maskva nie maje dastatkova resursu dla napadu na Polšču.
«Kali rasijanie nam pahražajuć, my ŭsprymajem hetyja pahrozy surjozna. Ale siońnia Pucin nie maje srodkaŭ, kab napaści na nas: chutčej za ŭsio, jon moža pasprabavać zładzić niejkuju pravakacyju. Jamu da hetaha času nie ŭdałosia zavajavać Danbas paśla amal trynaccaci hadoŭ sprob», — padkreśliŭ kiraŭnik polskaha MZS.
Razam z tym Sikorski vykazvaŭ dumku, što Rasija arhanizuje «apieracyju pad čužym ściaham», kab apraŭdać napad na krainu-člena NATA.
Premjer-ministr Polščy Donald Tusk zajaviŭ pra aściarohi adnosna mahčymaj rasijskaj pravakacyi, metaj jakoj źjaŭlajecca «vyprabavać rašučaść NATA».
Pierad hetym łatvijskaja raźviedka taksama paviedamiła, što Rasija rychtuje mahčymyja pravakacyi suprać krain Bałtyi abo Polščy, u pryvatnaści ataki z vykarystańniem bieśpiłotnikaŭ i inšyja hibrydnyja dziejańni, kab zmusić krainy NATA spynić padtrymku Ukrainy.
-
Zialenski adstaŭlaje papularnaha maładoha ministra abarony. U taho nie było ŭzajemarazumieńnia z Syrskim
-
«Kali pamrom, to razam». Žonka mužčyny, jakoha ledź nie zasmaktała ŭ iluminatar samalota Ryanair, raskazała pra pieražytaje
-
Pryniaćcie 21‑ha pakieta sankcyj suprać Rasii pieranieśli jašče na tydzień
Kamientary