Čamu mužčyny vysypajucca, a žančyny nie vysypajucca za toj ža čas?
U sučasnym śviecie stomlenaść stała pastajannaj spadarožnicaj mnohich žančyn. Časta takoje źniasileńnie tłumačać pierahruzkami, adnak navukovyja daśledavańni śviedčać, što pryčyny mohuć być fizijałahičnymi.
Statystyčnyja danyja pakazvajuć, što žančyny śpiać u siarednim na 11 chvilin daŭžej za mužčyn, adnak hetyja ličby nie adlustroŭvajuć jakaści adpačynku. Navat pry adnolkavaj praciahłaści snu žančyny čaściej paviedamlajuć pra pavyšanuju drymotnaść, tryvožnaść i stomlenaść na nastupny dzień.
Nievialikaje daśledavańnie z udziełam studentaŭ pakazała, što žančyny, jakija spali bolš za mužčyn pry padobnaj jakaści snu, usio roŭna adčuvali bolšy stres i źniasileńnie. Navukoŭcy pakul nie mohuć adnaznačna skazać, ci možna vyrašyć prablemu prosta dadatkovymi hadzinami ŭ łožku, piša vydańnie The Washington Post.
Cyrkadny rytm
Na dumku ekśpiertaŭ, ź jakimi parazmaŭlali žurnalisty The Washington Post, adnoj z pryčyn moža być asablivaść žanočaha cyrkadnaha rytmu — unutranaha bijałahičnaha hadzińnika, jaki rehuluje son, tempieraturu cieła i inšyja pracesy ŭ arhaniźmie. U žančyn hety cykł u siarednim krychu karaciejšy, tamu arhanizm schilny raniej patrabavać snu i raniej pračynacca.
Ale sučasny ład žyćcia časta prymušaje ludziej ihnaravać naturalnyja patreby arhanizma. Kali čałaviek vymušany kłaścisia spać paźniej abo pračynacca raniej, čym jamu fizijałahična kamfortna, uźnikaje tak zvany «sacyjalny džetłah» — stan, kali bijałahičny rytm nie supadaje z hrafikam pracy abo vučoby. Heta moža vyklikać chraničnuju stomlenaść, prablemy z zasynańniem i ciažkaje abudžeńnie ranicaj.
Psichałahičnyja i fizijałahičnyja faktary
Akramia taho, žančyny značna čaściej sutykajucca z prablemami, jakija niepasredna ŭpłyvajuć na son. Pavodle daśledavańniaŭ, ryzyka biassońnicy ŭ ich na 40—60% vyšejšaja, čym u mužčyn. Žančyny čaściej skardziacca na ciažkaści z zasynańniem i častyja prabudžeńni nočču.
Pryčyny mohuć być jak psichałahičnyja, tak i fizičnyja: bolšaja nahruzka ŭ kłopacie pra siamju, tryvožnyja razłady, depresija abo chraničny bol. Taksama ŭ žančyn čaściej sustrakajecca sindrom niespakojnych noh — stan, pry jakim čałaviek adčuvaje nieadolnaje žadańnie ruchać nahami padčas adpačynku.
Niekatoryja parušeńni snu ŭ žančyn mohuć zastavacca niezaŭvažanymi. Naprykład, apnoe — stan, kali dychańnie padčas snu pieryjadyčna spyniajecca, — tradycyjna ličycca bolš charakternym dla mužčyn. Ale paśla mienapaŭzy hetaje parušeńnie pačynaje sustrakacca ŭ žančyn amal hetak ža časta.
Pry hetym simptomy mohuć vyhladać inakš: kali mužčyny zvyčajna mocna chrapuć abo zadychajucca ŭ śnie, to žančyny čaściej adčuvajuć prosta stomlenaść, sanlivaść abo pryhniečany nastroj. Z-za hetaha prablema moža doŭha zastavacca niedyjahnastavanaj.
Asobna śpiecyjalisty adznačajuć rolu harmanalnych źmien. Ciažarnaść i pieryjad paśla rodaŭ mocna parušajuć son praz pastajanny dohlad dziciaci i pierabudovu arhanizma. Padčas pierymienapaŭzy i mienapaŭzy žančyny taksama časta pakutujuć ad prylivaŭ haračyni i načnoj patlivaści, jakija pieraškadžajuć paŭnavartasnamu adpačynku.
Bolš ciažkija nastupstvy niedasypańnia
Daśledavańni śviedčać i pra toje, što žančyny ciažej pieranosiać nastupstvy niedasypańnia. Kali kolkaść snu skaračajecca, niehatyŭny ŭpłyŭ na samaadčuvańnie ŭ ich moža być macniejšym, čym u mužčyn.
Pry vyvučeńni mazhavoj aktyŭnaści ludziej paśla niedasypańnia navukoŭcy vyjavili, što žanočy arhanizm patrabuje bolš hłybokaha snu dla adnaŭleńnia. Mienavita tamu niedachop adpačynku moža chutčej vyklikać prablemy z kancentracyjaj, pierapady nastroju i navat asłableńnie imunitetu.
Śpiecyjalisty padkreślivajuć: samaje važnaje — nie tolki kolkaść hadzin, ale i jakaść snu. Dobrym pakazčykam ličycca samaadčuvańnie ŭdzień. Kali čałaviek nie adčuvaje mocnaj stomlenaści paśla abiedu, heta moža śviedčyć pra toje, što arhanizm atrymlivaje dastatkova adpačynku.
Jak palepšyć son
Dla palapšeńnia snu daktary rajać niekalki prostych, ale efiektyŭnych krokaŭ. Uviečary varta abmiažoŭvać ałkahol i kafiein: choć ałkahol moža dapamahčy chutčej zasnuć, paźniej jon časta pravakuje zaŭčasnyja prabudžeńni.
Karysna vypracavać zaspakajalny viečarovy rytuał — admovicca ad ekranaŭ pierad snom, pačytać knihu, pryniać ciopłuju vannu abo pasłuchać muzyku. Važna kłaścisia i ŭstavać prykładna ŭ adzin i toj ža čas navat u vychodnyja, kab nie źbivać bijałahičny rytm.
Spalniu rekamiendujuć trymać prachałodnaj, ciomnaj i cichaj. A kali čałaviek pastajanna adčuvaje niedasyp, lepš pastupova zrušvać čas adychodu da snu — naprykład, kłaścisia na 15 chvilin raniej kožny viečar.
Ciapier čytajuć
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary