Niahledziačy na čatyry «tak» ad žury, biełaruska-ŭkrainski chor SPIEVY nie vystupić u finale polskaha šou talentaŭ
Chor emihrantak ź Biełarusi i Ukrainy SPIEVY, u jakim, siarod inšych, śpiavaje vakalistka i hołas minskaha vakzała Rusia Shuma (Maryna Šukiurava), skaryŭ žury papularnaha polskaha šou «Maju talent!» («Mam Talent!»). Adnak chor nie vystupić u finale.
Biełaruska-ŭkrainski žanočy chor SPIEVY nie trapić u finał papularnaha polskaha telešou «Mam talent!», niahledziačy na vyklučny pośpiech na šou. Pra heta ŭ efiry «Biełsata» paviedamiła suzasnavalnica kalektyvu śpiavačka Rusia.
Na etapie adboru vystupleńnie choru atrymała maksimalnuju padtrymku ekśpiertaŭ. Pavodle słoŭ Rusi, kalektyŭ atrymaŭ čatyry «tak» ad žury, adnak paźniej arhanizatary dasłali list z paviedamleńniem, što ŭ prajekcie «vielmi šmat aktoraŭ», i tamu chor nie pojdzie dalej.
Śpiavačka miarkuje, što pryčynaj mahli stać techničnyja składanaści ŭ pracy ź vialikaj hrupaj ludziej:
«Nu i, peŭna, mnie tak padajecca, heta maja fantazija, što davoli składana taki kalektyŭ zapakavać pa-pradziusarsku. Ujavicie, nu adzin-dva čałavieki — lahčej pracavać, a tut taki zapakavać — usie maci, pracujuć — heta prosta było niemahčyma technična».
Tym nie mienš, udzielnicy SPIEVY rasceńvajuć hety dośvied jak značnaje dasiahnieńnie dla papularyzacyi svajoj tvorčaści. Rusia adznačyła: «Nas ubačyli, nas pačuli, pakazali ŭ ryłsach, na telebačańni», dadaŭšy, što takaja ŭvaha daje šancy na atrymańnie kantraktaŭ u budučyni:
«Vielmi kłasna było nazirać za tym, jak aŭdytoryja voś tak: «A-ach!». Bo tut u Polščy niejak my nie sustrakajem kalektyvaŭ, jakija zajmajucca tradycyjnymi śpievami polskimi. Voś tamu palaki tak kłasna reahujuć na pamiežnuju kulturu, na biełaruskuju. I ludzi byli ŭ zachapleńni. Što tyčycca čalcoŭ žury, to, jak mnie padałosia, jany prosta kajfanuli i adpačyli».
Chor, jaki bazujecca ŭ Varšavie z 2023 hoda, abjadnoŭvaje emihrantak ź Biełarusi i Ukrainy vakoł vykanańnia tradycyjnych biełaruskich piesień.
Jon vykonvaje tradycyjnyja biełaruskija, a taksama śpievy pamiežnych terytoryj — Polščy, Ukrainy i Litvy. Ich možna sustreć na šmatlikich biełaruskich (i nie tolki) mierapryjemstvach ci pasłuchać anłajn — chor užo vypuściŭ mini-albom.
-
«Mnohija nie viedajuć, što my biełarusy». Muzyki ź Sierabranki zaśpiavali pa-francuzsku i stali zorkami
-
Žonka Kańje Uesta ŭ nadta śmiełym naradzie i mascy koški prahulałasia pa centry Tbilisi pad ručku z mužam FOTAFAKT
-
Jakija čysta biełaruskija žanry možna znajści na najbolš poŭnaj muzyčnaj karcie śvietu?
Ciapier čytajuć
«Ja nie praduhledzieła tolki adnaho: što mienavita hety kružočak vykarystajuć suprać mianie». Spoviedź Aliny Charysavaj paśla skandału z KDB44
«Ja nie praduhledzieła tolki adnaho: što mienavita hety kružočak vykarystajuć suprać mianie». Spoviedź Aliny Charysavaj paśla skandału z KDB
«70% mastakoŭ u čornych śpisach». Mastak Siarhiej Hrynievič paśla tryumfu ŭ Vieniecyi raskazaŭ pra hady maŭčańnia i pra toje, na jakim śviecie jon apynuŭsia1515
Kamientary