Kolki razoŭ za žyćcio my pieražyvajem pałkaje kachańnie?

Pavodle kłasičnaj trochkampanientnaj teoryi kachańnia psichołaha Robierta Sternbierha, jano składajecca ź blizkaści, addanaści i žarści.

Pałkaje kachańnie — heta forma, u jakoj straść vychodzić na pieršy płan. Jana charaktaryzujecca ŭzmocnienym fizijałahičnym uzbudžeńniem, mocnaj tuhoj pa kachanym čałavieku i jaho idealizacyjaj.

Pa svajoj pryrodzie heta pačućcio niestabilnaje: jano moža ŭspychvać na pačatku adnosin, a z časam źmianiacca, sastupajučy miesca bolš spakojnaj formie ramantyčnaj prychilnaści.

Daśledčyki dziesiacihodździami vyvučali miechanizmy ŭźniknieńnia žarści — jaje ŭpłyvu na mozh, pavodziny i emacyjny stan. Isnujuć šmatlikija pracy pra toje, jak heta pačućcio ŭźnikaje i jak jano prajaŭlajecca. Adnak pytańnie pra toje, kolki razoŭ u žyćci čałaviek pieražyvaje žarść, zastavałasia amal nie vyvučanym: raniejšyja pracy zvyčajna hruntavalisia na nievialikich vybarkach i nie davali poŭnaj karciny.

Kab zapoŭnić hety prabieł, amierykanskija daśledčyki praanalizavali adkazy 10 036 adzinokich darosłych žycharoŭ ZŠA. Kožnamu zadali pramoje pytańnie: kolki razoŭ u žyćci vy pieražyvali pałkaje kachańnie (passionate love)? Respandenty pavinny byli nazvać kankretnuju ličbu.

Paśla apracoŭki ŭsich adkazaŭ vyśvietliłasia: u siarednim na adnaho čałavieka prypadaje 2,05 takoha dośviedu — krychu bolš za dva vypadki za žyćcio.

Bolš padrabiaznaja karcina vyhladaje tak: 27,8% apytanych paviedamili, što pieražyvali pałkaje kachańnie adnojčy, 30,3% — dvojčy, 16,8% — try razy. Čatyry i bolš takich epizodaŭ adznačyli 10,9% udzielnikaŭ. Razam z tym 14,2% darosłych zajavili, što nikoli ŭ žyćci nie adčuvali padobnaha pačućcia.

Aŭtary padkreślivajuć: adsutnaść takoha dośviedu nie źjaŭlajecca adchileńniem abo patałohijaj. Heta davoli raspaŭsiudžanaja źjava, jakaja ŭkładvajecca ŭ naturalnuju raznastajnaść ramantyčnych bijahrafij.

U cełym vyniki pakazvajuć, što straść maje epizadyčny i niestabilny charaktar. Jana nie źjaŭlajecca pastajannym stanam, a ŭźnikaje ŭ peŭnyja pieryjady žyćcia. Daśledčyki taksama źviartajuć uvahu na mahčymy ŭpłyŭ pamiaci: najbolš jarkija abo apošnija adnosiny mohuć zaciamniać papiarednija, što ŭpłyvaje na toje, jak ludzi aceńvajuć svoj minuły ramantyčny dośvied.

Byli vyjaŭleny i demahrafičnyja adroźnieńni, choć jany akazalisia nievialikimi. Mužčyny ŭ siarednim paviedamlali pra krychu bolšuju kolkaść vypadkaŭ straści, čym žančyny (2,01 suprać 1,83). Najbolš vyrazna heta prajaŭlałasia siarod hieteraseksualnych udzielnikaŭ: u hetaj hrupie mužčyny paviedamlali pra bolšy dośvied pałkaha kachańnia, čym žančyny. Siarod hiejaŭ, leśbijanak i biseksualnych udzielnikaŭ istotnych hiendarnych adroźnieńniaŭ nie vyjavili.

Uzrost taksama byŭ źviazany z kolkaściu vypadkaŭ, ale suviaź akazałasia vielmi słaboj. Starejšyja ŭdzielniki paviedamlali pra krychu bolšy ahulny dośvied. Aŭtary tłumačać heta pieradusim tym, što ludzi, jakija pražyli daŭžej, mieli bolš času i mahčymaściaŭ dla adnosin. Nievialiki pamier efiektu moža śviedčyć, što novyja epizody pałkaha kachańnia ŭ stałym uzroście ŭźnikajuć adnosna niačasta.

Razam z tym daśledavańnie maje abmiežavańni. U im udzielničali tolki adzinokija darosłyja z ZŠA, tamu vyniki nielha aŭtamatyčna raspaŭsiudžvać na ludziej u šlubie abo na inšyja kulturnyja kanteksty. Akramia taho, paniaćcie passionate love (pałkaje kachańnie) u apytańni śpiecyjalna nie vyznačałasia, tamu ŭdzielniki mahli razumieć jaho pa-roznamu.

Tym nie mienš heta adno z najbolš maštabnych daśledavańniaŭ, jakoje sprabuje adkazać na prostaje, ale fundamientalnaje pytańnie: kolki razoŭ u žyćci čałaviek pieražyvaje straść. I atrymanyja dadzienyja nie padtrymlivajuć raspaŭsiudžanuju dumku, niby pałkaje kachańnie — heta pačućcio, jakoje abaviazkova pieražyvaje kožny i tolki adnojčy.

• 3
• 0
• 0
• 1
• 0
• 0
• 0
• 1