69 dzion biez urada. Premjer Danii narešcie sfarmavała kabiniet mienšaści
Miete Frederyksen, kiraŭnik Sacyjał-demakratyčnaj partyi, znoŭ stanie premjer-ministram Danii: joj udałosia stvaryć urad mienšaści. Jon budzie levacentrysckim, piša Bi-bi-si.
Paśla sustrečy z karalom Frederykam X Miete Frederyksen paviedamiła žurnalistam, što pradstavić novy kabiniet u sieradu. Jana ŭznačalić jaho ŭžo treci raz. Pavodle jaje słoŭ, pahadnieńnie było dasiahnuta paśla doŭhich i napružanych pieramoŭ.
Pa vynikach vybaraŭ u parłamient Danii ŭ sakaviku prajšli 12 partyj.
Zhodna z zajavaj pałaca, kaalicyja budzie składacca z sacyjał-demakrataŭ, Sacyjalistyčnaj narodnaj partyi, levacentralisckaj partyi «Radykalnaja Vienstre» i centrysckaj partyi «Umieranyja».
Sacyjalistyčnyja demakraty, tradycyjna najbujniejšaja partyja Danii, nabrali na vybarach u sakaviku ŭsiaho 21,8% hałasoŭ (38 mandataŭ) — heta ich najhoršy vynik z 1903 hoda. U paraŭnańni z papiarednim sklikańniem parłamientu sacyjał-demakraty stracili 12 miescaŭ. Tym nie mienš, u 48‑hadovaj Frederyksen — reputacyja dobraha antykryzisnaha lidara. Jaje pieradvybarčaja kampanija hruntavałasia na słohanie «premjer-ministr, na jakoha možna raźličvać».
U Sacyjalistyčnaj narodnaj partyi — 20 mandataŭ, va «Umieranych» — 14, u «Radykalnaj Vienstre» — 10. Takim čynam, u novaj kaalicyi ŭ sumie 82 miescy, a dla prastoha bolšaści ŭ 179‑miesnym parłamiencie nieabchodna 90.
Dackaja hramadskaja teleradyjokampanija DR adznačyła na svaim sajcie, što kraina pražyła 69 dzion biez novaha ŭrada. Vybary adbylisia 24 sakavika.
Jany ŭ lubym vypadku pavinny byli adbycca ŭ hetym hodzie nie paźniej za 31 kastryčnika, ale takuju rańniuju datu hałasavańnia mnohija źviazvajuć z rostam rejtynhu Frederyksen na fonie pahroz Trampa atrymać kantrol nad Hrenłandyjaj — aŭtanomnaj terytoryjaj u składzie Dackaha karaleŭstva. Jon ličyć Hrenłandyju stratehična važnaj dla nacyjanalnaj biaśpieki ZŠA.
Novamu ŭradu pryjdziecca praciahvać supraćstajańnie z Trampam.
Akramia hetaha, datčan chvaluje inflacyja i rost cenaŭ na žyćcio, piensijny ŭzrost (samy vysoki ŭ ES), atamnaja enierhietyka i ceny na bienzin. Važny i «zialony» paradak dnia: važnymi pytańniami dla vybarščykaŭ stali pravy žyvioł, vysoki ŭzrovień piestycydaŭ u pitnoj vadzie z-za śvinahadoŭli i ahulny ŭpłyŭ sielskaj haspadarki na klimat.
Frederyksen pozna ŭviečary ŭ paniadziełak napisała ŭ Instagram, što palityka, jakuju jana źbirajecca pravodzić, budzie dobraj jak dla ludziej, jakija žyvuć u Danii ciapier, tak i dla budučych pakaleńniaŭ, a taksama dla žyvioł.
Kamientary