U Hiermanii zabrali dapamohu ŭ biełaruski, jakaja syšłasia z haspadarom zdymnaj kvatery. Danos napisaŭ jaje źnikły bieź viestak muž

Hramadzianka Biełarusi z małoj dačkoj žyła ŭ Hiermanii na sacyjalnuju dapamohu, ale adnojčy ŭ sacyjalnuju słužbu pryjšoŭ list ad jaje aficyjnaha muža: maŭlaŭ, žonka zvykła žyć nie pa srodkach i machlaryć z vypłatami dziela ŭpryhožvańniaŭ i darahich pajezdak. Čynoŭniki zapadozryli, što žančyna nasamreč žyvie adnoj siamjoj z haspadarom kvatery, i spynili dapamohu. Ale sud staŭ na bok biełaruski — i pryznaŭ, što ŭsio abvinavačańnie trymałasia na adnych zdahadkach.

Pra heta śviedčyć rašeńnie Ziemskaha sacyjalnaha suda Paŭnočnaha Rejna-Viestfalii (Landessozialgericht NRW) ad 31 lipienia 2025 hoda pa spravie № L 12 AS 422/25 B ER. Imiony ŭsich udzielnikaŭ sud, pavodle niamieckaj praktyki, zašyfravaŭ litarami.

Jak biełaruska apynułasia na dapamozie

Žančyna mieła dazvoł na žycharstva ŭ Hiermanii z pravam na pracu. Ź lutaha 2021‑ha jana zamužam; u pary jość ahulnaja maleńkaja dačka. Sam muž z 30 studzienia 2024 hoda ličycca źnikłym bieź viestak — na jaho padadziena zajava ŭ palicyju. Sama biełaruska kazała, što miarkuje, byccam muža zabiła niejkaja siamja, i mienavita tamu jana źjechała z raniejšaha horada.

Razam z dačkoj jana atrymlivała dapamohu pa biespracoŭi. U červieni 2024 hoda jany pierajechali ŭ inšy horad i źniali ŭ haspadara dva pakoi z kuchniaj i vannaj: 500 jeŭra arendy plus 150 jeŭra kamunalnych.

Miascovaja sacyjalnaja słužba pryznačyła joj vypłaty ź lipienia 2024‑ha da červienia 2025‑ha — pad kaniec kala 1696 jeŭra na miesiac.

Zahadkavy list «ad muža»

26 vieraśnia 2024 hoda ŭ sacyjalnuju słužbu pryjšoŭ list. Data na im stajała 2022 hoda, a ŭ jakaści adpraŭnika — imia muža biełaruski. Aŭtar pisaŭ, što jon ź joju ŭ šlubie, maje dastatkovy zarobak, a žonka lubić žyć na šyrokuju nahu i schilnaja vymańvać sacyjalnyja vypłaty, kab dazvalać sabie ŭpryhožvańni i darahija padarožžy. Maŭlaŭ, jana navat zajmieła dadatkovaje žyllo.

Sam sud nazvaŭ aŭtara lista «nibyta adpraŭnikom»: dakumient byŭ datavany 2022 hodam, ale pryjšoŭ tolki ŭ vieraśni 2024‑ha — užo paśla taho, jak muž źnik. Chto nasamreč napisaŭ hety danos, z materyjałaŭ spravy nie zrazumieła.

Pravierki, botaks i dziciačaja horka

List zapuściŭ pravierki. Supracoŭniki sacyjalnaj słužby dvojčy pryjazdžali da žančyny dadomu — u listapadzie i śniežni 2024 hoda. Jany paličyli, što ŭ biełaruski niama ŭłasnaha adasoblenaha žylla: kuchnia ahulnaja z haspadarom, u chaładzilniku niama vyraznaha padziełu praduktaŭ, u pakoi staić darahi kampjutar (pa słovach žančyny — syna haspadara), a ŭ dvary — dziciačaja horka. Na hetaj padstavie viedamstva zapadozryła tak zvanuju Bedarfsgemeinschaft — «supolnaść patrebaŭ», kali ludzi viaduć ahulnuju haspadarku i dzielać vydatki, a značyć, dapamoha nie naležyć.

U listapadzie 2024 hoda sacyjalnaja słužba spyniła vypłaty, spasłaŭšysia na «istotnyja sumnievy» ŭ tym, što žančyna sapraŭdy maje patrebu ŭ dapamozie.

Biełaruska padała piarečańnie. Jana nastojvała, što nijakaj ahulnaj siamji z haspadarom niama, što jana samotnaja maci, a muž pa-raniejšamu ličycca źnikłym. Zamiežnyja pajezdki, da jakich pryčapilisia čynoŭniki, jana patłumačyła tak: u adnu krainu latała na sudovy praces praz vykradańnie svajho syna byłym mužam, a jašče była čatyrochdzionnaja aŭtobusnaja pajezdka ŭ Francyju; načavała ŭ abodvuch vypadkach u siabroŭ.

Jobcenter, adnak, ukazaŭ na jaje akaŭnt u instahramie: post pra pieralot z dačkoj u lutym 2025‑ha i post pra pajezdku ŭ sałon na praceduru z botaksam. Adkul hrošy na ŭsio heta, pytali čynoŭniki. Žančyna adkazała, što pajezdku da baćkoŭ praź Minsk apłacili sami baćki, a siabroŭki arhanizavali joj pajezdku i padaryli 200 jeŭra, «kab jana zrabiła sabie niešta pryjemnaje» — na hetyja hrošy jana i zrabiła botaks (100 jeŭra) i čystku zuboŭ.

Asobna čynoŭniki ŭčapilisia za dziciačuju horku ŭ dvary: maŭlaŭ, prosta tak haspadar arandatarcy takoha nie buduje — značyć, pamiž imi niešta bolšaje. A ŭ adnym bankaŭskim pieravodzie ad haspadara čynoŭniki ŭbačyli łaskavaje słova i pierakłali jaho jak «lalečka, miłaja». Haspadar ža potym piśmova zajaviŭ, što jany prosta žyvuć u adnoj kvatery, a zdahadki słužby — «čystaja fantazija». Sam jon, darečy, u śniežni 2024‑ha razarvaŭ damovu arendy.

Što skazaŭ sud

Sud pieršaj instancyi ŭ Dortmundzie spačatku admoviŭ žančynie. Ale apielacyjny Ziemski sacyjalny sud NRW rašeńnie źmianiŭ i staŭ na bok biełaruski.

Hałoŭny vyvad: sacyjalnaja słužba nie dakazała ničoha z taho, u čym abvinavačvali. Kab pryznać «supolnaść patrebaŭ», treba vyznačyć try rečy razam — što ludzi źjaŭlajucca partniorami, što žyvuć adnoj haspadarkaj i što hatovyja nieści adkaznaść adno za adnaho. Prezumpcyja takoha sajuza ŭźnikaje tolki paśla hoda sumiesnaha žyćcia — a biełaruska z haspadarom zasialiłasia tolki ŭ lipieni 2024-ha. Bolš za toje, sud źviarnuŭ uvahu: partniorstva praduhledžvaje mahčymaść šlubu, a žančyna farmalna ŭsio jašče zamužam za źnikłym mužam.

Sumiesnaje karystańnie kuchniaj, vannaj i haścioŭniaj, padkreśliŭ sud, samo pa sabie nie śviedčyć pra ahulnuju haspadarku. A viedamstva, zamiest taho kab pravieści narmalnaje rasśledavańnie i, naprykład, zapatrabavać źviestki ŭ samoha haspadara, abmiežavałasia sumnievami i zdahadkami. Na adnych sumnievach skasavać vypłaty nielha.

U vyniku sud adnaviŭ dziejańnie pieršapačatkovaha pryznačeńnia dapamohi za pieryjad ź śniežnia 2024‑ha da červienia 2025‑ha — heta značyć vypłaty pa 1696 jeŭra na miesiac viarnulisia.

• 2
• 1
• 7
• 8
• 1
• 1
• 2
• 0