Na prodaž vystaŭleny modny biznes-centr D16 — toj, kala jakoha ź ziamli vyrastaje ruka. Cana ŭražvaje
U 2020 hodzie korpus pa adrasie Daŭhabrodskaja, 16, dzie raniej raźmiaščalisia cech vyprabavańniaŭ i prajektnaje biuro Minskaha zavoda aŭtamatyčnych linij, na aŭkcyjonie nabyŭ biznesmien Alaksiej Karahin — uładalnik juvielirnych sietak «7 Karat», Diamante i «Zołotov».
U 2023‑m hodzie Karahin raskazvaŭ, što budynak byłoha zavoda pryvabiŭ jaho najpierš vysokimi stolami: na pieršym paviersie ich vyšynia dasiahaje šaści mietraŭ, na astatnich — čatyroch z pałovaj. Adnak hałoŭnym arhumientam staŭ košt.
Dakładnuju sumu pakupki biznesmien nie nazyvaŭ, ale adznačaŭ, što ŭ rekanstrukcyju było ŭkładziena prykładna ŭ piać razoŭ bolš srodkaŭ.
Pradprymalnik zachavaŭ histaryčny choł i paradnuju leśvicu, ale značna źmianiŭ interjer. Stol aformili biełaruskija dyzajniery, unutrany dvor upryhožyli hrafici, a vakoł budynka pakłali tratuarnuju plitku «Stary horad», daražejšuju za zvyčajnuju. Pierad uvachodam źjaviŭsia i niezvyčajny art-abjekt — čałaviečaja ruka, jakaja nibyta vyrastaje ź ziamli i trymaje čyrvony klon.
Novy biznes-centr atrymaŭ nazvu D16 i pačaŭ pracu ŭ 2023 hodzie. Častku treciaha paviercha zaniała kampanija samoha Karahina, astatnija pamiaškańni zdali ŭ arendu. Tady biznesmien śćviardžaŭ, što znajści arandataraŭ udałosia davoli chutka.
Adnak nieŭzabavie ŭłaśnik vyrašyŭ raźvitacca z abjektam. Jašče ŭ kancy 2024 hoda D16 upieršyniu źjaviŭsia na rynku nieruchomaści. Tady za biźnies-centr prasili bolš za $10,34 miljona.
Ciapier abjekt znoŭ vystaŭleny na prodaž. Jak paviedamlajecca na sajcie realt.by, novamu ŭładalniku prapanujuć šmatfunkcyjanalny biznes-centr ahulnaj płoščaj 5170 kvadratnych mietraŭ. U abjavie jon pazicyjanujecca jak hatovaja biznes-płatforma, jakaja moža vykarystoŭvacca jak dla ŭłasnych patreb kampanii, tak i dla atrymańnia arendnaha dachodu.
Budynak składajecca z čatyroch pavierchaŭ i cokalnaha ŭzroŭniu. Siarod jaho asablivaściaŭ adznačajucca vysokija stoli, panaramnyja vokny pamieram paŭtara na try mietry, bolš za dziesiać asobnych uvachodaŭ i mahčymaść lohkaj adaptacyi pamiaškańniaŭ pad roznyja vidy dziejnaści — ofisy, kramy, šoŭrumy, śfieru pasłuh, kaviarni abo restarany.
U apisańni taksama zhadvajucca asnoŭnaja i reziervovaja linii elektrazabieśpiačeńnia, sistema prytokava-vyciažnoj vientylacyi, vałakonna-aptyčnaja suviaź, sučasnaje aśviatleńnie, sanvuzły na kožnym paviersie i asobnaja zona dla charčavańnia supracoŭnikaŭ.
Na terytoryi jość zakryty ŭnutrany dvor i naziemnaja parkoŭka. Pradaviec padkreślivaje, što budynak nie patrabuje dadatkovych układańniaŭ i ŭžo całkam hatovy da ekspłuatacyi. U abjavie taksama adznačajecca, što pakupniku nie daviadziecca apłačvać pasłuhi ryełtarskaj arhanizacyi.
Cikava, što ŭ paraŭnańni z kancom 2024 hoda zajaŭlenaja cana abjekta istotna źniziłasia. Ciapier biznes-centr aceńvajecca prykładna ŭ $9 miljonaŭ.
Ciapier čytajuć
U Biełarusi znajšli kopiju šviejcarskich Alpaŭ — ale turystaŭ tam nie čakajuć2
Kamientary