Na «załatym paŭvostravie» ŭ centry Minska chočuć źnieści vielizarny zavod i pabudavać žyllo
Jašče adzin cichi kutok Minska trapiŭ u pole zroku staličnych horadabudaŭnikoŭ. U chutkim časie pieramieny mohuć pryjści ŭ rajon vulic Pulichava — Čyrvonaarmiejskaj — prestyžnaje miesca, jakoje jašče nazyvajuć «załatym paŭvostravam». Tut płanujecca znos dvuchpaviarchovikaŭ, siadzibnych damoŭ, a taksama vielizarnaha zavoda. Zamiest ich niedaloka ad nabiarežnaj Śvisłačy źjaviacca šmatkvaternyja damy, hramadskija abjekty i novaja daroha. U administracyi Leninskaha rajona dniami startuje abmierkavańnie prajekta. Realt raskazvaje, što płanujecca pabudavać.
Administracyja Leninskaha rajona Minska pravodzić hramadskaje abmierkavańnie horadabudaŭničaha prajekta detalovaha płanavańnia ŭ miežach: «vulica Uljanaŭskaja — vulica Pieršamajskaja — vulica Pulichava — vulica Smalenskaja — vulica Lenina». Havorka idzie pra terytoryju płoščaj 78 hiektaraŭ.
Na hety momant u miežach prajektavańnia žyvie ŭsiaho kala 1500 čałaviek. Tut raźmieščanyja žyłyja damy (sučasnyja šmatpaviarchoviki i staryja dvuchpaviarchoviki), hatel «Piekin», stankabudaŭničy zavod imia Kirava, adździaleńnie Biełaruskaj čyhunki, paliklinika i navat niekalki pryvatnych damoŭ.
Da kvartała prymykaje raka Śvisłač, hałoŭnaja minskaja rovarnaja ściežka, a taksama zialonyja zony — bulvar pa vulicy Pulichava i park imia 40‑hodździa Vialikaha Kastryčnika. Jość tut i historyka-kulturnyja kaštoŭnaści. Heta — terytoryja byłoha kapišča pobač sa Śvisłačču, a taksama žyłyja kvartały na Pieršamajskaj — Uljanaŭskaj.
Što tut płanujecca zrabić?
Treba adznačyć, što płany pieraŭtvareńnia hetaha spakojnaha kutka stalicy abmiarkoŭvajucca nie pieršy raz. Tak, adno z hučnych hramadskich abmierkavańniaŭ prajšło tut jašče ŭ 2017 hodzie.
Miarkujučy pa prajekcie, dla dvuchpaviarchovych damoŭ pa Čyrvonaarmiejskaj, 20 i 22 ničoha nie źmianiłasia. Horadabudaŭniki pa-raniejšamu majuć namier ich źnieści. Na ŭčastku, jaki vyzvalicca, prapanujecca raźmiaščeńnie sacyjalnych abo handlova-bytavych abjektaŭ.
Taksama pad buldozier pavinna adpravicca žyłaja siadzibnaja zabudova, jakaja cudam zachavałasia tut, — heta 6 pryvatnych damoŭ pa vulicy Smalenskaj.
Adno ž z samych bujnych pieraŭtvareńniaŭ — vynas z prajektavanaj terytoryi pabudoŭ zavoda imia Kirava, a taksama składoŭ i majsterniaŭ. Treba adznačyć, što ciapier budynki na hetym učastku naležać roznym kampanijam, jakija ŭ svoj čas kupili hetuju ziamlu na aŭkcyjonie. U PDP zhadvajucca takija pradpryjemstvy, jak «Płazma Bud», «Biełbiznesaljans», «Fieliks».
Na miescy zavodskich karpusoŭ u budučyni źbirajucca pabudavać šmatfunkcyjanalnyja kompleksy z błokami žyłoj šmatkvaternaj vysokaščylnaj zabudovy. Novabudoŭli zabiaśpiečać aŭtastajankami, parkinhami i hramadskim transpartam. Taksama ŭ kvartale pabudujuć dziciačy sad na 230 miescaŭ, handlova-bytavyja centry i spartyŭna-azdaraŭlenčy centr.
Darečy, u apisańni prajekta jość cikavaja zaŭvaha: «Dola žyłoj častki ŭ składzie šmatfunkcyjanalnych kompleksaŭ i budynkaŭ nie pavinna pieravyšać 50% ahulnaj płoščy». Akramia taho, niedapuščalna raźmiaščeńnie žyłych pamiaškańniaŭ na pieršych pavierchach zbudavańniaŭ.
Jak i raniej, u płanach horadabudaŭnikoŭ značacca novaja vulica i novy most praz raku Śvisłač. Takim čynam prajekciroŭščyki chočuć złučyć Čyrvonaarmiejskuju i Lenina. Praciahłaść novaj vulicy składzie mienš za kiłamietr. Darečy, minuły raz žychary vystupali suprać aŭtamabilnaj darohi pad voknami, bo ciapier tam rastuć drevy i znachodzicca spartyŭnaja placoŭka.
U vyniku ŭsich źmienaŭ nasielnictva mikrarajona pavialičycca z 1470 da 3800 čałaviek, a ahulnaja kolkaść kvater vyraście z 683 da 1693-ch. Pravieści ŭsie pieraŭtvareńni źbirajucca ŭ raźlikovy termin da 2035 hoda.
Materyjały prajekta ŭžo vykładzienyja na sajcie administracyi Leninskaha rajona.
Hramadskaje abmierkavańnie prajekta budzie prachodzić z 29 studzienia pa 12 lutaha. Zaŭvahi i prapanovy z paznakaj «hramadskaje abmierkavańnie» prymajuć u terminy praviadzieńnia pa adrasie: 220006, Minsk, Majakoŭskaha, 83 (albo na elektronny adras: [email protected]). Vyniki padviaduć na pasiadžeńni architekturna-horadabudaŭničaj Rady pry hałoŭnym architektaru horada Minska.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary