Estonskaja kampanija raspracavała navatarskuju rakietu-pierachopnik suprać šachiedaŭ
Supraćdronavaja rakieta Mark I pazicyjanujecca jak kiravany pierachopnik małoj dalokaści, pryznačany dla masavaj vytvorčaści. Rakieta ŭžo prajšła vyprabavańni i chutka budzie zapuščanaja ŭ vytvorčaść.
Raspracoŭščykam supraćdronavaj rakiety Mark I źjaŭlajecca estonski abaronny startap Frankenburg Technologies. Kampanija nazyvaje svaju raspracoŭku samaj małoj u śviecie kiravanaj rakietaj, daŭžynia jakoj składaje ŭsiaho 60—65 sm.
Na videa, pradstaŭlenym kampanijaj, vidać, jak ich rakieta Mark 1 uźlataje i atakuje bieśpiłotnik ź vintavym ruchavikom, jaki svaimi charaktarystykach (chutkaść kala 200 km/h i razmach kryłaŭ kala 2 mietraŭ) prykładna adpaviadaje pamieram typovaha šachieda rasijskaj vytvorčaści («Hierań-2»).
Frankenburg Mark I missile in a short-range air-defence engagement against a Shahed-type target
The video shows the Mark I missile in a live-fire test, demonstrating:
- Launch of a moving fixed-wing Class III target drone (200 km/h)
- Target detection and tracking by an external… pic.twitter.com/64cbzQ6jtw
Startap zajaŭlaje, što ad pačatkovaj idei da demanstracyi bajavych strelbaŭ prajšło 13 miesiacaŭ — i supraćpastaŭlaje hety termin tradycyjnym rakietnym prahramam, jakija časta raściahvajucca na šmat hadoŭ. Varta adznačyć, što rakieta Mark I była sprajektavanaja mienavita dla bajavych vyprabavańniaŭ va ŭmovach realnaha kanfliktu, i ciapier jaje rychtujuć da pastaŭki va Ukrainu dla pravierki efiektyŭnaści.
Pry hetym kampanija asabliva akcentuje, što rakieta pabudavanaja całkam z kamiercyjna dastupnych kampanientaŭ. Heta dazvalaje nie tolki zabiaśpiečyć maštabnaść vytvorčaści, ale i radykalna źnizić košt — raspracoŭščyki imknucca davieści canu adnoj rakiety da «nizkaha piaciznačnaha značeńnia» (prykładna 10 000—30 000 dalaraŭ). Taki padychod pavinien zrabić źbićcio tannych dronaŭ ekanamična apraŭdanym, što niemahčyma pry vykarystańni tradycyjnych sistem SPA, dzie adna rakieta moža kaštavać miljony.
Zhodna z zajavami kampanii, dalokaść dziejańnia Mark I składaje nie mienš za 2 kiłamietry. Rakieta moža pracavać jak zbroja typu «streliŭ i zabyŭsia» abo vykarystoŭvać zachop celi paśla pusku dla jaje paražeńnia ŭ składanych umovach nadvorja. Paviedamlajecca, što rakiety mohuć nieści vybuchoŭku.
Sa słoŭ raspracoŭščykaŭ, rakietnaja sistema patrabuje ŭsiaho niekalkich hadzin navučańnia apieratara, što adkryvaje mahčymaść praktyčna lubomu vajskoŭcu — abo cyvilnamu śpiecyjalistu pa biaśpiecy — unosić svoj układ u misii supraćpavietranaj abarony.
Paviedamlajecca, što rakieta vyklikała vialikuju cikavaść u Jeŭropie. U minułym hodzie najbujniejšy dziaržaŭny abaronny chołdynh Polščy Polska Grupa Zbrojeniowa i estonskaja Frankenburg Technologies abviaścili pra pahadnieńnie ab supracoŭnictvie ŭ halinie supraćpavietranaj abarony, płanujučy vypuskać 10 000 takich rakiet štohod.
U pačatku hetaha hoda vytvorca padpisaŭ miemarandum ab supracoŭnictvie z brytanskaj abaronnaj kampanijaj Babcock, jakaja płanuje raspracavać kantejniernuju marskuju sistemu zapusku dla rakiet Mark I. Pakul viadoma tolki, što ŭsie inžyniernyja raboty buduć pravodzicca ŭ Vialikabrytanii. Inšyja padrabiaznaści pakul nie razhałošvajucca.
Kamientary