NASA pazapłanava viartaje na Ziamlu čatyroch astranaŭtaŭ

Jak paviedamlaje The New York Times, upieršyniu za čverć stahodździa pracy Mižnarodnaj kaśmičnaj stancyi ekipaž vymušany pakinuć arbitu daterminova pa miedycynskich pakazańniach.

Rašeńnie ab viartańni čatyroch udzielnikaŭ misii Crew-11 pryniaŭ 8 studzienia kiraŭnik NASA Džared Ajziekman. Ahienctva zachoŭvaje kanfidencyjalnaść i nie nazyvaje ni imia astranaŭta, ni kankretny dyjahnaz, adnak padkreślivaje, što stan pacyjenta aceńvajecca jak «absalutna stabilny».

Hałoŭny doktar NASA Džejms Połk rastłumačyŭ situacyju tak: pakidać čałavieka na arbicie ź niavyznačanym dyjahnazam va ŭmovach abmiežavanych miedycynskich resursaŭ — zanadta vialikaja ryzyka. Tamu kiraŭnictva vyrašyła prajavić aściarožnaść i viarnuć ekipaž na Ziamlu ŭ ramkach «kantralavanaj miedycynskaj evakuacyi». Pradstaŭniki NASA adznačajuć, što heta nie ekstranaja situacyja, a ŭzvažanaja miera zaściarohi.

U bližejšyja dni karabiel SpaceX Crew Dragon adstykujecca ad MKS i nakirujecca da Ziamli dla pryvadnieńnia ŭ Cichim akijanie pablizu San-Dyjeha. Damoŭ viernucca astranaŭty NASA Ziena Kardman i Majkł Fink, astranaŭt Japonskaha ahienctva aerakaśmičnych daśledavańniaŭ (JAXA) Kimija Jui i kasmanaŭt «Raskosmasa» Aleh Płatonaŭ. Ich misija pačałasia ŭ žniŭni i pavinna była zaviaršycca tolki ŭ nastupnym miesiacy, paśla prybyćcia źmieny.

Paviedamlajecca, što Fink i Kardman u čaćvier, 8 studzienia, pavinny byli ździejśnić šaścihadzinny vychad u adkryty kosmas dla madernizacyi sistemy elektrazabieśpiačeńnia stancyi. Adnak jon byŭ adkładzieny. Pa słovach doktara Połka, miedycynskaja prablema nie maje nijakaha dačynieńnia da vychadu ŭ adkryty kosmas abo pracy samoj stancyi.

Pavodle źviestak NASA, dla Majkła Finka heta ŭžo čaćviorty palot na kaśmičnuju stancyju, a dla Kimii Jui — druhi. Kardman i Płatonaŭ adpravilisia ŭ kosmas upieršyniu

U ramkach misii niekatoryja členy ekipaža ŭdzielničajuć u daśledavańniach, pryśviečanych acency ŭpłyvu padarožžaŭ u daloki kosmas na zdaroŭje čałavieka. Hetaja praca ŭklučaje vyvučeńnie taho, jak arhanizm zasvojvaje vitaminy hrupy V u kosmasie i jak adbyvajecca pieraraźmierkavańnie vadkaściej u arhaniźmie va ŭmovach pastajannaj biazvažkaści.

Paśla adlotu Crew-11 na stancyi zastanucca troje kasmanaŭtaŭ, jakija prybyli tudy na karabli «Sajuz» u listapadzie. Im daviadziecca skaracić abjom navukovych daśledavańniaŭ, kab zabiaśpiečvać pracu stancyi mienšym składam.

Zaraz NASA i SpaceX razhladajuć mahčymaść pieranosu zapusku nastupnaj misii, Crew-12, na bolš rańni termin. Pry hetym kiraŭnictva zapeŭnivaje, što situacyja, jakaja skłałasia, nijak nie paŭpłyvaje na hrafik misii Artemis II — palotu vakoł Miesiaca, zapłanavanaha na nastupny miesiac.

• 0
• 0
• 0
• 0
• 0
• 0
• 0
• 0