Upieršyniu za bolš jak paŭstahodździa ludzi znoŭ palaciać da Miesiaca
U lutym NASA płanuje zapuścić misiju «Artemida-2», u ramkach jakoj čaćviora astranaŭtaŭ adpraviacca ŭ vandroŭku vakoł Miesiaca. Heta stanie pieršym palotam čałavieka za miežy kalaziamnoj arbity paśla zaviaršeńnia prahramy «Apałon» u 1972 hodzie.
Misija z čatyrma astranaŭtami pravieryć karabiel «Aryjon» (Orion) va ŭmovach dalokaha kosmasu i padrychtuje vysadku na paŭdniovy polus Miesiaca da kanca dziesiacihodździa, piša ixbt.com.
U skład ekipaža ŭvajšli Ryd Vajzman, Viktar Hłovier i Kryścina Koch z NASA, a taksama Džeremi Chansien z Kanadskaha kaśmičnaha ahienctva.
Misija «Artemida-2» (Artemis II) pryznačana dla testavańnia sistem i kampanientaŭ kaśmičnaha karabla «Aryjon». Astranaŭty ździejśniać ablot Miesiaca pa trajektoryi, jakaja dazvolić viarnuć ich na Ziamlu navat u vypadku admovy ruchalnaj ustanoŭki. U adroźnieńnie ad misij «Apałon» (Apollo), «Artemida-2» nie budzie vychodzić na nizkuju kalamiesiacovuju arbitu, a ździejśnić šyroki ablot vakoł spadarožnika.
Palot «Artemida-2» taksama maje hieapalityčnaje značeńnie, pakolki razhladajecca jak adkaz na chutkaje raźvićcio kaśmičnaj prahramy Kitaja. Misija stanie važnym etapam na šlachu da vysadki astranaŭtaŭ u rajonie paŭdniovaha polusa Miesiaca, zapłanavanaj na kaniec hetaha dziesiacihodździa.
Padčas 45‑chvilinnaha pieryjadu maksimalnaha zbližeńnia ź Miesiacam karabiel stracić suviaź ź Ziamloj. «Ja byŭ by rady, kali b uvieś śviet — hetyja 8 miljardaŭ čałaviek… mahli sabracca razam i prosta spadziavacca i malicca pra toje, kab my adnavili sihnał», — skazaŭ Hłovier.
Akramia techničnych vyprabavańniaŭ, «Artemida-2» praviadzie šerah navukovych daśledavańniaŭ. Astranaŭty buduć aceńvać svoj kahnityŭny stan, son, uzrovień stresu, imunny adkaz i sardečna-sasudzistaje zdaroŭje. Na borcie taksama buduć raźmieščanyja čypy z tkankami čałaviečych orhanaŭ dla vyvučeńnia ŭpłyvu dalokaha kosmasu na arhanizm. Ekipaž budzie analizavać i fatahrafavać hieałahičnyja asablivaści miesiacovaj pavierchni, takija jak udarnyja kratary i staražytnyja łavavyja patoki.
Misija budzie prachodzić na rakiecie Space Launch System (SLS) z karablom «Aryjon». Paśla vychadu na zadadzienuju trajektoryju «Aryjon» adździelicca ad vierchniaj stupieni SLS i pačnie samastojny palot. «Aryjon» pieraadoleje 385 400 kiłamietraŭ pamiž Ziamloj i Miesiacam. Na takoj adlehłaści astranaŭty sutyknucca z bolš vysokim uzroŭniem radyjacyi, čym na MKS.
Asablivaja ŭvaha nadadziena ciepłaachoŭnamu ekranu karabla «Aryjon», jaki zaścierahaje jaho ad ekstremalnaha nahrevu pry viartańni ŭ atmaśfieru Ziamli. Padčas vyprabavalnaha palotu «Artemidy-1» (Artemis I) u 2022 hodzie na ekranie byli vyjaŭlenyja paškodžańni, i NASA praviało raboty pa likvidacyi prablemy.
«Artemida-2» stanie važnym krokam na šlachu da stvareńnia pastajannaha miesiacovaha pasielišča, dzie astranaŭty zmohuć pracavać i treniravacca — rychtavacca da jašče bolš składanych misij, naprykład, palotu na Mars.
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»3
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»
Vajb-prahramavańnie źmienić rolu raspracoŭščyka, RLVR, i kali łopnie burbałka. Biełarus-inžynier u halinie ŠI, jaki pracuje ŭ ZŠA, raskazaŭ, što nas čakaje ŭ 202633
Kamientary