Na Słuččynie sa stralboj zatrymali mužčynu, padazravanaha ŭ vykradańni dziaŭčyny
U Słuckim rajonie adbyłasia sproba vykradańnia čałavieka, paviedamlaje DAI Minskaj vobłaści. U milicyju źviarnuŭsia miascovy žychar i paviedamiŭ, što nieviadomy mužčyna siłaj pasadziŭ jaho 18‑hadovuju znajomuju ŭ aŭtamabil i pajechaŭ u nieviadomym kirunku.
Supracoŭniki Słuckaha RAUS nieadkładna vyjechali na miesca. Niepadalok ad ahraharadka Łučniki jany zaŭvažyli aŭtamabil Opel, jaki adpaviadaŭ apisańniu, i padali jamu sihnał ab spynieńni. Adnak kiroŭca praihnaravaŭ patrabavańnie i pasprabavaŭ uciačy, što zmusiła vieści za im pahoniu.
Kali mašyna źmienšyła chutkaść, vykradzienaj dziaŭčynie ŭdałosia vybracca ź jaje. Pasadziŭšy dziaŭčynu ŭ słužbovy aŭtamabil, siłaviki praciahnuli pahoniu.
Kiroŭca, jak śćviardžajecca, nieadnarazova ihnaravaŭ patrabavańni ab spynieńni, tamu ŭrešcie milicyjaniery vykarystali słužbovuju zbroju.
Za rulom znachodziŭsia 32‑hadovy miascovy žychar, jaki raniej užo nieadnarazova pryciahvaŭsia da kryminalnaj adkaznaści. Jon pavodziŭ siabie nieadekvatna, mahčyma, byŭ pad uździejańniem psichaaktyŭnych rečyvaŭ. Mužčynu zatrymali i źmiaścili ŭ izalatar časovaha ŭtrymańnia, a jaho bijałahičnyja ŭzory nakiravali na ekśpiertyzu.
Ciapier suprać jaho raspačali kryminalnuju spravu pa fakcie vykradańnia čałavieka.
Ciapier čytajuć
Na svoj dzień naradžeńnia Zialenski z Naŭrockim, Naŭsiedam i Cichanoŭskaj u Vilni ŭšanuje pamiać Kastusia Kalinoŭskaha2
Kamientary