U pradmieści Ryma znajšli reštki zbudavańniaŭ bolš čym dvuchtysiačnaj daŭniny
U pryharadzie Ryma italjanskija archieołahi znajšli vialiki archieałahičny kompleks z reštkami pachavańniaŭ, śviatyni i rytualnych basiejnaŭ, uzrost jakich pieravyšaje dźvie tysiačy hadoŭ. Znachodki datujucca pieryjadam ad V stahodździa da našaj ery da I stahodździa našaj ery i adnosiacca pieravažna da respublikanskaj epochi Staražytnaha Ryma, paviedamlaje vydańnie Arkeonews.
U centry daśledavanaj terytoryi dobra zachavałasia staražytnaja daroha III stahodździa da n. e., jakaja ŭ toj čas išła ŭzdoŭž vodnaha šlachu da raki Ańjenie. Paźniej, užo ŭ I stahodździ da n. e., jaje adhalinavańni ŭmacavali kamiennaj kładkaj. Adnak ź ciaham času šlach straciŭ svajo značeńnie — pra heta śviedčać pachavańni II—III stahodździaŭ, znojdzienyja vakoł, što, vierahodna, było vyklikana źmienami ŭ łandšafcie.
Na zakančeńni darohi archieołahi adkapali nievialikuju kaplicu z tynkavanymi ścienami, ałtarom i nišaj dla statui. Daśledčyki vyznačyli, što jana była ŭźviedziena na miescy achviaraprynašeńniaŭ baham. Znojdzienyja statuetki, bronzavyja maniety i vyjavy žyvioł śviedčać, što śviatynia była pryśviečanaja rymskamu bohu Hierkulesu i funkcyjanavała ŭ kancy III abo ŭ II stahodździ da n. e.
Akramia hetaha, na ŭčastku znajšli vapniakovyja pachavańni ź dźviuma hrabnicami, datavanymi IV — pačatkam III stahodździa da n.e. U adnoj ź ich znajšli sarkafah, pachavalnyja urny i roznyja pradmiety pobytu, u druhoj — łavy ŭzdoŭž ścien z mužčynskimi pareštkami. Navukoŭcy miarkujuć, što abiedźvie hrabnicy pieršapačatkova byli złučanyja i naležali zamožnaj siamji.
Taksama archieołahi znajšli dva vialikija basiejny daŭžynioj 28 i 21 mietr. U adnym ź ich znachodziłasia vada, adnak dakładnaje pryznačeńnie hetych zbudavańniaŭ pakul nieviadoma. Isnuje zdahadka, što jany mahli vykarystoŭvacca dla relihijnych abradaŭ.
Jak adznačajuć daśledčyki, usie hetyja znachodki dapamahajuć lepš zrazumieć, jak staražytnyja rymlanie vykarystoŭvali hetuju miascovaść jak dla rytualnych patreb, tak i dla štodzionnaha žyćcia.
U Italii znajšli baziliku, sprajektavanuju staražytnarymskim architektaram Vitruvijem
Kitajskija archieołahi adnavili pazałočanyja daśpiechi bolš čym tysiačahadovaj daŭniny
U Indaniezii znajšli najstaražytniejšyja ŭ śviecie ŭzory naskalnaha žyvapisu
La ŭźbiarežža Danii znajšli karabiel uzrostam bolš za 600 hadoŭ. Raniej takija bačyli tolki na malunkach
Ciapier čytajuć
Dziaciej-futbalistaŭ z Rečycy pavieźli ŭ Hielendžyk pa pryfrantavoj vobłaści Rasii. U aŭtobus papaŭ bieśpiłotnik41
Dziaciej-futbalistaŭ z Rečycy pavieźli ŭ Hielendžyk pa pryfrantavoj vobłaści Rasii. U aŭtobus papaŭ bieśpiłotnik
Cichanoŭskaja pra ŭdar pa aŭtobusie ź biełaruskimi dziećmi: Nie ryzykujcie žyćciom — nie jedźcie ŭ Rasiju, jakaja viadzie złačynnuju i niespraviadlivuju vajnu77
Kamientary