TikTok padpisaŭ pahadnieńnie ab prodažy amierykanskaha padraździaleńnia kampanii inviestaram z ZŠA
TikTok u ZŠA ŭvachodzić u novy etap svajho raźvićcia. Kitajskaja kampanija ByteDance padpisała pahadnieńnie, jakoje źmianiaje schiemu vałodańnia amierykanskaj častkaj servisu. Havorka idzie nie pra zabaronu abo sychod z rynku, ale ŭmovy pracy płatformy istotna źmianiajucca.
Takim čynam zaviaršajecca praciahły kanflikt pamiž TikTok i ŭładami ZŠA. Amierykanski bok nastojvaŭ na pieraraźmierkavańni kantrolu, spasyłajučysia na pytańni nacyjanalnaj biaśpieki, a kampanija imknułasia zachavać svaju prysutnaść na najbujniejšym rynku, nie straciŭšy ŭpłyŭ całkam.
Pa infarmacyi vydańnia Axios, ByteDance damoviłasia ab stvareńni asobnaj struktury — TikTok USDS Joint Venture LLC. Mienavita praź jaje budzie funkcyjanavać amierykanski siehmient TikTok. Kantrolny pakiet akcyj atrymajuć inviestary z ZŠA, a kiravańnie voźmie na siabie rada dyrektaraŭ ź siami čałaviek, bolšaść ź jakich buduć hramadzianami Złučanych Štataŭ. Heta było pryncypovaj umovaj Vašynhtona. Zaviaršeńnie ździełki zapłanavana na 22 studzienia 2026 hoda.
U skład uładalnikaŭ novaj kampanii ŭvojduć niekalki bujnych hulcoŭ. Oracle, Silver Lake i inviestycyjny fond MGX z Abu-Dabi razam atrymajuć 45% akcyj. Amal tracina dolaŭ adydzie strukturam, źviazanym ź ciapierašnimi inviestarami ByteDance. Prykładna 20% zastaniecca ŭ samoj kitajskaj kampanii — heta maksimalna dazvolenaja dola zhodna z amierykanskim zakanadaŭstvam u śfiery nacyjanalnaj biaśpieki.
Supraćstajańnie ciahnułasia bolš za hod. Jano pačałosia jašče pry administracyi Džo Bajdena, kali viasnoj 2024 hoda byŭ pryniaty zakon, jaki faktyčna staviŭ TikTok pierad vybaram: źmianić ułaśnikaŭ abo pakinuć rynak ZŠA. Paśla viartańnia Donalda Trampa ŭ Bieły dom pramoj zabarony nie stała, a terminy dla zaklučeńnia ździełki dvojčy padaŭžalisia. U vieraśni Tramp uchvaliŭ płan prodažu amierykanskich aktyvaŭ TikTok miascovym inviestaram, i tady košt ździełki aceńvaŭsia prykładna ŭ 14 miljardaŭ dalaraŭ.
Dla zvyčajnych karystalnikaŭ u ZŠA amal ničoha nie źmienicca: dadatak praciahnie pracavać u zvykłym režymie, biez novych abmiežavańniaŭ. Adnak dla samoj płatformy pačynajecca inšy etap — farmalny kantrol pierachodzić da amierykanskaha boku, a ByteDance zastajecca na rynku ŭžo biez vyrašalnaha ŭpłyvu.
Stali viadomyja žachlivyja abstaviny śmierci byłoha vučonaha sakratara Instytuta historyi. Jamu było 45 hadoŭ31
Stali viadomyja žachlivyja abstaviny śmierci byłoha vučonaha sakratara Instytuta historyi. Jamu było 45 hadoŭ
Jaje nie chacieli brać u muzyčnuju škołu, a ŭ 14 jana syhrała ŭ Karniehi-chole ŭ Ńju-Jorku. Biełaruskaja skrypačka — pra žyćcio ŭ Łondonie, zarobki i čym skrypka Stradyvary za 14 miljonaŭ jeŭra adroźnivajecca ad zvyčajnaj1414
Kamientary