Prezident ZŠA ŭ piatnicu praciahnuŭ na 75 dzion termin, na praciahu jakoha kitajskaja technałahičnaja kampanija ByteDance pavinna pradać amierykanskija aktyvy svajho papularnaha dadatku TikTok u ZŠA niekitajskamu pakupniku.
Inakš jana sutykniecca z zabaronaj na dziejnaść u ZŠA, jakaja pavinna była ŭstupić u siłu jašče ŭ studzieni, piša Rasijskaja słužba Radyjo Svaboda.
Viasnoj 2024 hoda Pałata pradstaŭnikoŭ amierykanskaha Kanhresa ŭchvaliła zakon, jaki dazvalaje zabaranić vykarystańnie sacyjalnaj sietki TikTok u ZŠA, kali jaje amierykanskaje padraździaleńnie nie budzie vyłučana z kampanii ByteDance, jakaja vałodaje TikTok.
Zakanadaŭcy ŭkazvali na ryzyku taho, što kitajski ŭrad moža vykarystoŭvać TikTok dla špijanažu za amierykancami i praviadzieńnia schavanych apieracyj upłyvu. Zakon, pryniaty ź pieravažnaj dvuchpartyjnaj padtrymkaj, padpisaŭ tahačasny prezident Džo Bajden.
Zabarona na TikTok u ZŠA pavinna była ŭstupić u siłu 19 studzienia 2025 hoda, ale była praciahnuta Trampam da 5 krasavika adrazu paśla jaho inaŭhuracyi. U piatnicu Tramp skazaŭ, što jaho administracyja znachodzicca na suviazi z čatyrma roznymi kampanijami nakont mahčymaj ździełki z TikTok. Što heta za kampanii, jon nie ŭdakładniŭ.
«Ździełcy patrabujecca bolš času, kab zabiaśpiečyć padpisańnie ŭsich nieabchodnych pahadnieńniaŭ», — napisaŭ Tramp u sacyjalnych sietkach, tłumačačy svajo rašeńnie ab praciahu pracy TikTok u ZŠA.
ByteDance paćvierdziła, što viadzie pieramovy z amierykanskimi ŭładami, ale zajaviła, što pakul zastalisia niavyrašanymi niekatoryja «klučavyja pytańni». Akramia taho, nieabchodnaje ŭchvaleńnie ździełki ŭładami KNR, jakija niezadavolenyja taryfnaj palitykaj prezidenta ZŠA i prymajuć miery ŭ adkaz.
Tramp namiaknuŭ na mahčymaść taho, što TikTok moža stać častkaj bolš šyrokaj ździełki z Kitajem, mahčyma, u abmien na źmianšeńnie impartnych pošlin.
Abmiarkoŭvajecca mahčymaść, pry jakoj ciapierašnija amierykanskija inviestary ByteDance zmohuć praciahnuć svaje inviestycyi ŭ niezaležnuju kampaniju TikTok, u jakuju taksama ŭvojduć novyja inviestary, takija jak Oracle i Blackstone.
Isnuje taksama niavyznačanaść adnosna ałharytmu TikTok, jaki moža zastacca pad kantrolem ByteDance, što supiarečyć duchu amierykanskaha zakona ab biaśpiecy. Ekśpierty padkreślivajuć, što TikTok biez svajho ałharytmu hublaje bolšuju častku svajoj kaštoŭnaści.
Kamientary