Biełaruska ŭ Litvie atrymała paśviedčańnie kiroŭcy z 11‑j sproby i raskazała, kolki heta kaštavała
Biełaruska Maryja jak vydatnica pa žyćci raźličvała, što i ekzamieny ŭ litoŭskaj aŭtaškole zdaść ź pieršaha razu, ale ŭsio pajšło nie pa płanie — na atrymańnie pravoŭ jana vydatkavała dva hady žyćcia i amal 2700 jeŭra. Dziaŭčyna raspaviała «Našaj Nivie», jak tak atrymałasia.
Pierajechaŭšy ŭ Litvu, Maryja pajšła vučycca ŭ miascovuju aŭtaškołu Vairuok čia z nula (da hetaha jana nikoli nie sadziłasia za styrno mašyny).
Dziaŭčyna zdała teoryju ź pieršaha razu. Dla praktyki sama abrała miechaniku. Praŭda, kali praz 14 zaniatkaŭ u jaje ŭsio jašče atrymlivałasia vielmi drenna, instruktar skamandavaŭ: dalej tolki aŭtamat.
Na hetym etapie Maryja ŭžo addała škole 500 jeŭra. Dalej jana zapłaciła svajmu instruktaru 680 jeŭra za 17 dadatkovych zaniatkaŭ na mašynie z aŭtamatyčnaj karobkaj pieradač.
«Instruktar hety byŭ niebłahi, jon nikoli nie hublaŭ ciarplivaść, nie kryčaŭ, ale mnie było krychu składana ź im, tamu što jon maŭčaŭ i čakaŭ ad mianie dziejańniaŭ, jakija ja jašče nie zasvoiła. Jašče ja vielmi chvalavałasia znachodzicca siarod mašyn i niaredka jechała 30 kiłamietraŭ za hadzinu zamiest 50», — zhadvaje Maša.
Pa paradzie znajomych jana źviarnułasia da inšaha instruktara — tym bolš na rachunku była ŭžo novaja zdača teoryi za 20 jeŭra (bo z času minułaj prajšoŭ hod) i šosty pravał na praktyčnym ekzamienie.
«Novy instruktar sapraŭdy šmat čaho daŭ na zaniatkach. Da taho ž, značna ŭmacavałasia maja ŭpeŭnienaść», — adznačaje surazmoŭca.
Za dzieviać zaniatkaŭ ź inšym instruktaram Maryja zapłaciła jašče 450 jeŭra. Taksama joj pryjšłosia addać 350 jeŭra za pierakładčykaŭ na ekzamienach: vučyłasia dziaŭčyna na ruskaj movie, ale z 2025 hoda prymać ekzamien pa-rusku ŭ Litvie zabaroniena.
U vyniku praktyčny ekzamien dziaŭčyna zmahła zdać z 11‑j sproby — za ŭsie pierazdačy praktyki ŭ sumie jana zapłaciła 454 jeŭra.
«Na ekzamienie dapuskajecca vosiem niekrytyčnych pamyłak, ale krytyčnaj — nivodnaj. Na dziasiatuju sprobu ja zhadała ŭsie parady pra dychańnie, zaziamleńnie i hetak dalej. I było amal cudoŭna, ale ŭsio ž krytyčnuju pamyłku ja dapuściła. Kali ja pajšła zdavać 11‑ty raz, to, kali ščyra, užo nijakaj nadziei nie mieła. Moža, tamu ŭrešcie i zdała».
Dadatkovy artykuł raschodaŭ skłali vykliki taksi da aŭtaškoły i nazad (kala 200 jeŭra). Samo afarmleńnie pravoŭ za piać dzion abyšłosia amal u 40 jeŭra.
«Zdajecca, praściej było b zdać na pravy ŭ 18 hadoŭ, kali jašče byŭ nie taki mocny instynkt samazachoŭvańnia, ale i ciapier ja ni pra što nie škaduju. Ja prajšła ŭvieś hety šlach sama i lehalna. Kali b spyniłasia dzieści pasiaredzinie, tady b hrošy byli stračanyja darma. Ja ž mahu siabie supakojvać vialikim dośviedam kiravańnia, — adznačaje Maryja. —
Kaniečnie, štoraz paśla čarhovaj niaŭdačy ja mocna chvalavałasia, ale hałoŭnaje, što mianie nichto nie valiŭ. Kryteryi tut realna žorstkija ŭ paraŭnańni ź Biełaruśsiu (pa słovach znajomych, bo ja tam nie vučyłasia). Ale, moža, tak i treba — kab novaje pakaleńnie kiroŭcaŭ sapraŭdy narmalna jeździła».
Ciapier čytajuć
Pamiatajecie kadeta, jaki na sustrečy z Łukašenkam śmieła vystupiŭ pa-biełarusku? Jon vyjechaŭ z krainy18
Kamientary