Беларуска ў Літве атрымала пасведчанне кіроўцы з 11‑й спробы і расказала, колькі гэта каштавала
Беларуска Марыя як выдатніца па жыцці разлічвала, што і экзамены ў літоўскай аўташколе здасць з першага разу, але ўсё пайшло не па плане — на атрыманне правоў яна выдаткавала два гады жыцця і амаль 2700 еўра. Дзяўчына распавяла «Нашай Ніве», як так атрымалася.
Пераехаўшы ў Літву, Марыя пайшла вучыцца ў мясцовую аўташколу Vairuok čia з нуля (да гэтага яна ніколі не садзілася за стырно машыны).
Дзяўчына здала тэорыю з першага разу. Для практыкі сама абрала механіку. Праўда, калі праз 14 заняткаў у яе ўсё яшчэ атрымлівалася вельмі дрэнна, інструктар скамандаваў: далей толькі аўтамат.
На гэтым этапе Марыя ўжо аддала школе 500 еўра. Далей яна заплаціла свайму інструктару 680 еўра за 17 дадатковых заняткаў на машыне з аўтаматычнай каробкай перадач.
«Інструктар гэты быў неблагі, ён ніколі не губляў цярплівасць, не крычаў, але мне было крыху складана з ім, таму што ён маўчаў і чакаў ад мяне дзеянняў, якія я яшчэ не засвоіла. Яшчэ я вельмі хвалявалася знаходзіцца сярод машын і нярэдка ехала 30 кіламетраў за гадзіну замест 50», — згадвае Маша.
Па парадзе знаёмых яна звярнулася да іншага інструктара — тым больш на рахунку была ўжо новая здача тэорыі за 20 еўра (бо з часу мінулай прайшоў год) і шосты правал на практычным экзамене.
«Новы інструктар сапраўды шмат чаго даў на занятках. Да таго ж, значна ўмацавалася мая ўпэўненасць», — адзначае суразмоўца.
За дзевяць заняткаў з іншым інструктарам Марыя заплаціла яшчэ 450 еўра. Таксама ёй прыйшлося аддаць 350 еўра за перакладчыкаў на экзаменах: вучылася дзяўчына на рускай мове, але з 2025 года прымаць экзамен па-руску ў Літве забаронена.
У выніку практычны экзамен дзяўчына змагла здаць з 11‑й спробы — за ўсе пераздачы практыкі ў суме яна заплаціла 454 еўра.
«На экзамене дапускаецца восем некрытычных памылак, але крытычнай — ніводнай. На дзясятую спробу я згадала ўсе парады пра дыханне, зазямленне і гэтак далей. І было амаль цудоўна, але ўсё ж крытычную памылку я дапусціла. Калі я пайшла здаваць 11‑ты раз, то, калі шчыра, ужо ніякай надзеі не мела. Можа, таму ўрэшце і здала».
Дадатковы артыкул расходаў склалі выклікі таксі да аўташколы і назад (каля 200 еўра). Само афармленне правоў за пяць дзён абышлося амаль у 40 еўра.
«Здаецца, прасцей было б здаць на правы ў 18 гадоў, калі яшчэ быў не такі моцны інстынкт самазахоўвання, але і цяпер я ні пра што не шкадую. Я прайшла ўвесь гэты шлях сама і легальна. Калі б спынілася дзесьці пасярэдзіне, тады б грошы былі страчаныя дарма. Я ж магу сябе супакойваць вялікім досведам кіравання, — адзначае Марыя. —
Канечне, штораз пасля чарговай няўдачы я моцна хвалявалася, але галоўнае, што мяне ніхто не валіў. Крытэрыі тут рэальна жорсткія ў параўнанні з Беларуссю (па словах знаёмых, бо я там не вучылася). Але, можа, так і трэба — каб новае пакаленне кіроўцаў сапраўды нармальна ездзіла».
Цяпер чытаюць
Аляксей Хлястоў, які пайшоў у таксісты, стаў героем інтэрнэту. Беларусы запусцілі флэшмоб, каб падтрымаць спевака з чорнага спісу12
Каментары