U Mastoŭskim rajonie pradajuć za simvaličnuju canu dziciačy łahier
U Mastoŭskim rajonie na Hrodzienščynie vystavili na aŭkcyjon spartyŭna-azdaraŭlenčy łahier «Alimpijec». Kompleks budynkaŭ płoščaj kala 400 kvadratnych mietraŭ i vialiki ziamielny ŭčastak pradajucca na placoŭcy «BUTB-Majomaść» pa pačatkovaj canie ŭsiaho 210 rubloŭ, piša Office Life.
Hety łahier budavaŭsia pastupova z 1961 da 2011 hoda. U skład uvachodzić hałoŭny draŭlany korpus ź piačnym aciapleńniem, letni domik, charčbłok i niekalki prybudoŭ. Novy ŭładalnik atrymaje ŭ arendu na 50 hadoŭ učastak płoščaj 1,5 hiektara ŭ malaŭničym miescy — pobač praciakajuć reki Nioman, Zazulka i Jelnia, a taksama tut znachodziacca dva voziery.
Ciapier «Alimpijec» naležyć abłasnomu centru alimpijskaha reziervu pa viesłavalnych vidach sportu. Pavodle ŭmovaŭ prodažu, pakupnik musić raspačać haspadarčuju dziejnaść na terytoryi łahiera praz dva—čatyry hady paśla zaklučeńnia damovy — uličvajučy mahčymuju rekanstrukcyju abo znos budynkaŭ. Elektronnyja tarhi pryznačanyja na 15 śniežnia.
Učastak možna vykarystoŭvać dla abjektaŭ sportu i azdaraŭleńnia, ale pry ŭzhadnieńni ź miascovymi ŭładami dapuskajecca źmianić jaho pryznačeńnie. Naprykład, budynki možna pieraabstalavać pad žyłyja pamiaškańni abo vykarystoŭvać majomaść dla asabistaj haspadarki.
Niadaŭna pad Minskam pryvatnaja meblevaja kampanija nabyła na tarhach były dziciačy łahier «Kiraviec» za 2,9 miljona rubloŭ.
Kamientary