Čerhaŭ na miažy ciapier nie budzie? Čaho čakać ad adkryćcia «Bruzhoŭ» i «Bierastavicy»
Polšča z 17 listapada płanuje adkryć dva pamiežnyja pierachody ź Biełaruśsiu: «Babroŭniki — Bierastavica» i «Kuźnica — Bruzhi». Pahladzieli, jak heta moža paŭpłyvać na situacyju z čerhami na miažy.
«Bierastavica — Babroŭniki»
Punkt propusku «Bierastavica — Babroŭniki» pavinien całkam adnavić pracu dla ŭsich katehoryj transpartu, to bok praź jaho pajeduć u tym liku aŭtobusy i hruzaviki.
Hety punkt propusku nie funkcyjanavaŭ biez małoha try hady, bo Polšča zakryła jaho z 10 lutaha 2023 hoda ŭ adkaz na prysud Andžeju Pačobutu.
Za hety čas na biełaruskim baku adbyłasia rekanstrukcyja «Bierastavicy». Punkt uračysta adkryli 14 lutaha 2025 hoda. Tady ž ahučyli novyja ličby prapusknoj zdolnaści hetaha pierachodu.
Za sutki ŭ adzin bok biełaruski bok moža afarmlać da 1400 lehkavych aŭto, 425 hruzavikoŭ i 125 aŭtobusaŭ. Nakolki hetyja ličby realistyčnyja i ci budzie hatovy polski bok prymać stolki transpartu — pakul nieviadoma.
Što źmianiłasia paśla rekanstrukcyi
Pry hetym davoli vuzki most praz raku Śvisłač, jaki ŭpłyvaje na prapusknuju zdolnaść hetaha pierachodu, nie źmianiŭsia. Pa spadarožnikavych zdymkach bačna, što na polskim baku ŭ «Babroŭnikach» taksama ničoha nie źmianiłasia.
Na biełaruskim baku ŭźviali novy budynak dla afarmleńnia pasažyraŭ ź dźviuma załami ŭmiaščalnaściu pa 60 čałaviek, pastavili krytyja naviesy dla pracy pamiežnikaŭ i dva novyja vahahabarytnyja kompleksy z dynamičnymi vahami i padvyšanym modulem.
Jak było da zakryćcia?
Ci paŭpłyvaje heta niejak na kolkaść transpartu, jaki budzie pierasiakać miažu — nieviadoma, tamu my možam abapiracca tolki na abjomy, jakija byli da zakryćcia miažy. I hetyja ličby radujuć.
Da zakryćcia praz «Bierastavicu» prajazdžała kala 500 adzinak pasažyrskaha transpartu ŭ adzin bok.
Tak, naprykład, u apošnija sutki pracy ź Biełarusi ŭ Polšču vyjechaŭ 491 lehkavik.
Byvali i bolš «praduktyŭnyja» dni: 12.01.2023 hoda (faktyčna za miesiac da zakryćcia) było aformlena 555 lehkavikoŭ u adzin bok, a 1 lutaha 2023 — 572.
Pa propusku pasažyrskaha transpartu «Bierastavica» tady sastupała tolki «Brestu».
Što pa hruzavikach?
Što da hruzavoha trafiku, to kolkaść aformlenaha transpartu mocna adroźnivałasia ŭ zaležnaści ad času. Kali ŭ pačatku 2022 hoda ź Biełarusi ŭ Polšču praz «Bierastavicu» vyjazdžała kala 300 hruzavikoŭ za sutki, to ŭ apošnija miesiacy pracy — ad 100 da 200 hruzavikoŭ.
Tym nie mienš, navat kali praz «Bierastavicu» budzie prajazdžać kala 150 fur za sutki, to adzin hety punkt propusku ź lohkaściu kampiensuje dva zakrytyja da 1 śniežnia punkty propusku na miažy ź Litvoj. Praz «Bieniakoni» i «Kamienny Łoh» razam uziatyja za sutki ź Biełarusi ŭ Litvu ŭ vieraśni vyjazdžała ŭ siarednim kala 135 fur.
I heta z ulikam kalininhradskaha tranzitu, bo, jak bačna pa statystycy, kala 40‑50 fur ź Biełarusi ŭ Litvu praz «Kamienny Łoh» prajazdžaje i ciapier.
«Bruzhi — Kuźnica»
U adroźnieńnie ad «Bierastavicy», «Bruzhi» zapracujuć tolki dla lehkavych aŭto. Hruzavy transpart i aŭtobusy praz hety punkt propusku, prynamsi na pieršym etapie jeździć, nie buduć. Heta pierš za ŭsio źviazana z tym, što na polskim baku jašče nie zavieršana hłabalnaja rekanstrukcyja trasy i inšaj infrastruktury.
«Bruzhi» — adzin z samych bujnych punktaŭ propusku.
Na sajcie Dziaržpahrankamiteta paznačana, što
za sutki ŭ adzin bok praz «Bruzhi» moža prajazdžać 1600 lehkavikoŭ, što supastaŭlalna ź pierachodam «Brest», dzie za sutki moža prajechać da 1700 lehkavikoŭ. Ale «Brest» pryznačany tolki dla pasažyrskaha transpartu, a «Bruzhi» — multyfunkcyjanalny pierachod.
Takim čynam, pa ahulnaj ličbie transpartu, jaki moža prajechać za sutki, «Bruzhi» źjaŭlajucca samym bujnym punktam propusku.
Jakoj stanie prapusknaja zdolnaść de-fakta, pakul nieviadoma. Ale pierśpiektyvy vialikija, praz toj ža «Brest» ciapier ź Biełarusi ŭ Polšču prajazdžaje ŭ siarednim kala 700—750 adzinak pasažyrskaha transpartu.
Takim čynam, adnaŭleńnie pracy «Bruzhoŭ» i «Bierastavicy» pavinna značna źmienšyć čerhi na miežach i zrobić pajezdki ŭ Jeŭrasajuz bolš dastupnymi va ŭsich sensach.
Niekalki važnych niuansaŭ
Čym jašče važna adkryćcio dadatkovych pierachodaŭ na miažy z Polščaj?
Pa-pieršaje, Polšča ŭ adroźnieńnie ad Łatvii i Litvy nie zabaraniała prajezd turystyčnych aŭtobusaŭ pa svajoj terytoryi.
Pa-druhoje, u Polšču možna jechać na aŭto ź biełaruskimi numarami biez asablivych abmiežavańniaŭ.
Hałoŭnaje, kab miažu na aŭto pierasiakaŭ ułaśnik transpartnaha srodku i, adpaviedna, mašyna nie naležała jurydyčnaj asobie.
U Litvu na aŭto ź biełaruskimi numarami možna jechać tolki hramadzianam ES, a taksama biełarusam ź litoŭskaj vizaj abo DNŽ Litvy.
U Łatvii dziejničaje poŭnaja zabarona na pierasoŭvańnie na aŭto ź biełaruskaj rehistracyjaj.
Nahadajem, što navat paśla zapłanavanaha adkryćcia «Bruzhoŭ» i «Bierastavicy» ŭ Biełarusi zastanucca zakrytymi jašče dva punkty propusku ŭ Bresckaj vobłaści. «Piasčatka» i «Damačava» byli zakrytyja jašče z časoŭ dziejańnia kavidnych abmiežavańniaŭ.
Ciapier čytajuć
Stali viadomyja padrabiaznaści taho, jak u Vjetnamie zatrymali Vieramiejčyka2
Kamientary