Mitrapalit Vienijamin prapanavaŭ uzhadnić mahčymy vizit Papy Lva ChIV u Biełaruś z patryjarcham Kiryłam
Mahčymy vizit Papy Lva XIV u Biełaruś pavinien abmiarkoŭvacca z kiraŭnikom RPC, patryjarcham Maskoŭskim i ŭsioj Rusi Kiryłam z ulikam mierkavańnia sinoda Biełaruskaj pravasłaŭnaj carkvy. Pra heta zajaviŭ kiraŭnik Biełaruskaj pravasłaŭnaj carkvy Vienijamin na sustrečy sa śpiecyjalnym pasłańnikam Papy kardynałam Kłaŭdya Hudžeroci 27 kastryčnika.
Na sustrečy Vienijamin padkreśliŭ, što Hudžeroci viedajuć u Biełarusi i ceniać jaho namahańni pa ŭmacavańni pazityŭnaha vobrazu Biełarusi za miažoj. Surazmoŭcy abmierkavali «duchoŭnuju i relihijnuju situacyju ŭ śviecie, stanovišča chryścijanaŭ u krainach Blizkaha Uschodu, a taksama nibyta ŭcisk Ukrainskaj pravasłaŭnaj carkvy», paviedamlaje pres-słužba BPC.
Baki adznačyli stanoŭčuju rolu ŭzajemadziejańnia BPC i Kaścioła ŭ Biełarusi i pahadzilisia, što važna zachoŭvać dobryja i davierlivyja adnosiny «ŭ umovach niaprostaj situacyi ŭ śviecie».
Na sustrečy abmiarkoŭvałasia pytańnie vizitu Papy ŭ Biełaruś. Vienijamin adznačyŭ, što taki vizit u lubuju krainu — asablivaja padzieja, i prapanavaŭ abmierkavać jaho z kiraŭnikom RPC patryjarcham Kiryłam, bo bolšaść viernikaŭ u Biełarusi — pravasłaŭnyja. BPC znachodzicca ŭ jurysdykcyi Maskoŭskaha patryjarchata.
«U Biełarusi adnosiny Carkvy i Kaścioła składajucca stanoŭčym čynam, niahledziačy na papiarednija składanyja pieryjady ŭ ajčynnaj historyi. Baki pahadzilisia, što nieabchodna ŭličvać fakt taho, što ŭ krainie bolšaść viernikaŭ naležyć da Biełaruskaj pravasłaŭnaj carkvy Maskoŭskaha patryjarchata, i važna, kab tema vizitu abmiarkoŭvałasia taksama sa Śviaciejšym patryjarcham Maskoŭskim i ŭsioj Rusi Kiryłam i z ulikam mierkavańnia sinoda Biełaruskaj pravasłaŭnaj carkvy», — zajaŭlaje BPC.
Hudžeroci prybyŭ u Biełaruś 25 kastryčnika na śviatkavańnie 100‑hodździa Pinskaj jeparchii, na vychodnych jon braŭ udzieł va ŭračystaściach u Pinsku i Breście.
U paniadziełak jon sustreŭsia z Alaksandram Łukašenkam i kiraŭnikom MZS Maksimam Ryžankovym.
Ciapier čytajuć
Jany pajšli ad nas u 2025 hodzie. Zhadvajem biełarusaŭ, jakich my stracili4
Kamientary