Rasijanina adpravili na 15 hadoŭ u turmu za prapanovu synu-vajskoŭcu zdacca ŭ pałon i pierajści na bok Ukrainy
Žychar Varkuty (Respublika Komi), 45‑hadovy Hienadź Kałašnikaŭ asudžany na 15 hadoŭ strohaha režymu pa abvinavačańni ŭ sprobie ŭhavaryć syna, jaki vajuje na froncie, zdacca va ŭkrainski pałon i ŭstupić u šerahi zabaronienaha rasijskimi ŭładami Ruskaha dobraachvotnickaha korpusa, piša The Moscow Times.
Mužčynu sudzili pa artykułach ab schileńni da ŭdziełu ŭ terarystyčnaj supolnaści (č. 1.1 art. 205.1 KK RF), publičnym apraŭdańni teraryzmu (č. 2 art. 205.2) i zaklikach da ekstremisckaj dziejnaści z vykarystańniem internetu (č. 2 art. 280).
U FSB zajaŭlali, što ŭ sakaviku 2024 hoda Kałašnikaŭ «schilaŭ svajho syna, jaki prachodzić słužbu ŭ zonie «śpiecyjalnaj vajskovaj apieracyi», da zdačy ŭ pałon vorahu», kab potym ustupić u «adno z praŭkrainskich padraździaleńniaŭ». Akramia taho, siłaviki abvinavačvali mužčynu ŭ raźmiaščeńni ŭ Telegram pastoŭ z uchvaleńniem dziejańniaŭ «ukrainskich vajenizavanych farmiravańniaŭ, u tym liku pryznanych terarystyčnymi i zabaronienych u Rasii», a taksama ŭ zaklikach da napadaŭ na rasijskich vajskoŭcaŭ.
Advakat Kałašnikava paviedamlaŭ, što fihurant nazyvaŭ siabie pacyfistam i ciažka pieražyvaŭ udzieł syna ŭ vajnie, a prapanovy zdacca ŭ pałon USU «nasili žartoŭny charaktar». Pavodle słoŭ varkucinca, u paviedamleńniach było šmat smajlikaŭ, jakija paźniej źnikli z materyjałaŭ spravy. Zaklikajučy syna pierajści ŭ RDK, Kałašnikaŭ nie viedaŭ, što korpus źjaŭlajecca praŭkrainskaj strukturaj, tłumačyła abarona padsudnaha.
Akramia taho, pavodle advakata, zakliki da hvałtu z boku jaho padabaronnaha byli skiravanyja na ŭdzielnikaŭ PVK «Vahnier» i jaje stvaralnika Jaŭhiena Pryhožyna, a nie na vajskoŭcaŭ Uzbrojenych sił RF. Z-za «vahnieraŭcaŭ», jak kazaŭ Kałašnikaŭ, paciarpieli žychary zachoplenaha Rasijaj Bachmuta. Fihurant nie moh zaklikać da zabojstvaŭ bajcoŭ rehularnaj armii chacia b tamu, što adzin ź ich — jahony syn, zajaŭlali jurysty.
Kałašnikaŭ praviadzie try hady ŭ turmie i jašče 12 hadoŭ u kałonii strohaha režymu. Akramia taho, jon atrymaŭ štraf 400 tysiač rasijskich rubloŭ (kala 5000 dalaraŭ) i zabaronu na try hady administravańnia sajtaŭ u internecie.
Kamientary