Ramzan Kadyraŭ tydzień nie źjaŭlajecca na publicy. Kažuć, što jaho terminova špitalizavali ŭ Maskvie

Pavodle źviestak, atrymanych vydańniem «Novaja hazieta Jevropa» ad svaich krynic, Ramzan Kadyraŭ płanavaŭ udzielničać u pasiadžeńni asabista i navat prylacieŭ u Maskvu 24 śniežnia. Adnak u noč pierad pasiadžeńniem jahony stan zdaroŭja rezka pahoršyŭsia, tamu palityka dastavili ŭ reanimacyi ŭ Centralnuju kliničnuju balnicu Kiraŭnictva spravami prezidenta RF. Zapasnaha varyjanta na vypadak takoj situacyi nie było, tamu Dziaržsaviet prajšoŭ biez udziełu pradstaŭnika Čačni.

Pa słovach krynicy z atačeńnia Kadyrava, u Maskvie daktary ź ciažkaściu stabilizavali jaho stan, paśla čaho jon viarnuŭsia dadomu. Z taho času kiraŭnik Čačni nie źjaŭlajecca na publicy.

Prablemy sa zdaroŭjem Kadyrava nazirajucca ŭžo nie pieršy hod. Paśla špitalizacyi ŭ pryvatnaj klinicy Hroznaha «Ajmiedy» ŭ pačatku minułaha hoda jaho stan praciahvaŭ paharšacca. Uskosna heta paćvierdziŭ i sam Kadyraŭ padčas niadaŭniaj pramoj linii, kali paviedamiŭ, što za hod čatyry razy chadziŭ u aficyjny adpačynak. Dla kiraŭnika rehijona, jaki raniej pracavaŭ u nienarmavanym režymie i praktyčna bieź pierapynkaŭ, heta nietypovaja situacyja. Asabliva pakazalna, što adzin z navahodnich adpačynkaŭ sioleta doŭžyŭsia amal dva miesiacy.

Padčas toj ža pramoj linii Kadyraŭ pryznaŭ, što maje prablemy ź niervovaj sistemaj: pastajannaje napružańnie i drennaje samaadčuvańnie. Jon patłumačyŭ heta pieražyvańniami za čačenskich vajskoŭcaŭ, jakija znachodziacca na froncie va Ukrainie.

U vyniku na praciahu hoda kiraŭnik Čačni źjaŭlaŭsia ŭ publičnaj prastory vielmi redka i faktyčna pierastaŭ kiravać rehijonam u zvykłym dla siabie farmacie. Bolšaść času jon pravodzić abo ŭ svajoj rezidencyi, abo ŭ klinicy «Ajmiedy». Pavodle źviestak žurnalistaŭ, sioleta jaho dvojčy kansultavali zamiežnyja daktary, u tym liku ŭ Hiermanii i ŭ pryvatnaj klinicy ŭ Dubai, ale istotnaha palapšeńnia heta nie dało. Adna z krynic śćviardžaje, što nadziei na pazityŭny dla Kadyrava vynik vielmi małyja.

Niahledziačy na surjoznyja prablemy sa stanam zdaroŭja, administracyja prezidenta Rasii ŭžo ŭchvaliła kandydaturu Kadyrava dla ŭdziełu ŭ vybarach kiraŭnika Čačenskaj Respubliki, zapłanavanych na 2026 hod. Ci isnuje ŭ Kramla zapasny płan na vypadak, kali jon nie zmoža ŭdzielničać u vybarach, pakul nieviadoma. Pavodle krynic, nijakich pieramoŭ z mahčymymi pierajemnikami Kadyrava ŭ Maskvie ciapier nie viadziecca.

• 3
• 1
• 1
• 2
• 0
• 1
• 0
• 0